- zhig po bdud rtsi/
- ID:
- T168485
- ཞིག་པོ་བདུད་རྩི (Tibetan, Tibetan script, Original)
- > zhig po bdud rtsi/ (Tibetan, Latin script, Transliteration-THL Extended Wylie Transliteration)
- > zhikpo dütsi (Tibetan, Latin script, Transcription-THL Simplified Tibetan Transcription)
Other Dictionaries
2. Thupten Phuntsok Dictionary
གསང་སྔགས་རྙིང་མའི་བླ་མ་མཚན་སྙན་ཤིན་ཏུ་ཆེ་བ་ཞིག་ཡིན། རབ་བྱུང་གསུམ་པའི་ས་སྦྲུལ (༡༡༤༩) ལོར་ཡབ་སངས་རྒྱས་དྭགས་ཆུང་སྲས་སུ་སྐུ་འཁྲུངས། དགུང་ལོ་གཉིས་ཙམ་ནས་ཡབ་གཤེགས་ཏེ་ཡུམ་གྱིས་བསྐྱངས། ཆེར་སྐྱེས་པ་དང་གོས་བཅོས་པ་ཐམས་ཅད་ལམ་ཟན་པ་སྙིང་རྗེ་བ་ཞིག་ཡོད་པ་ལ་བྱིན། ཡུམ་གྱིས་འབར་བས་ཀྱང་མ་ཕན། ཞང་པོ་དམ་པ་སེར་སྦྲག་པའི་སར་ལོ་གསུམ་ཙམ་སློབ་གཉེར་གནང་ནས་རྫོགས་ཆེན་རོང་ལུགས་ཀྱི་ཆོས་སྐོར་རྣམས་གསན། རྡོ་རྗེ་གདན་ལ་མཆོད་པ་ལན་གསུམ་བསྐྱལ་བ་དང་། ལྷ་སའི་ཇོ་བོ་རྣམ་གཉིས་ཀྱི་ཞབས་ཏོག་ལན་བཞི་མཛད། ལྷ་སའི་རྡོ་རགས་ལན་བཞི་མཛད་ནས་ཕྱི་མར་སྐུ་གཤེགས།
- language:
- Tibetan
3. gangs can mkhas grub rim byon ming mdzod
ཁོང་ནི་རབ་བྱུང་གསུམ་པའི་ས་མོ་སྦྲུལ་ལོ་སྟེ་སྤྱི་ལོ 1149 ལོར་ལྷ་གདོང་དགོན་པར་ཡབ་སངས་རྒྱས་དྭགས་ཆུང་དང་ཡུམ་ཝང་མོ་གཉིས་ཀྱི་སྲས་སུ་སྐུ་འཁྲུངས། རབ་བྱུང་གསུམ་པའི་ས་མོ་ལུག་ལོ་སྟེ་སྤྱི་ལོ 1199 ལོར་རྒྱ་ར་གད་ལོགས་ཀྱི་དགོན་པར་སྐུ་གཤེགས། ཁོང་དགུང་ལོ་ཆུང་ངུའི་དུས་ནས་ཡབ་གཤེགས་ཤིང་། ཞང་པོ་དབུས་པ་སྟོན་ཤཱཀ་སྟེ་དམ་པ་སེ་སྦྲག་གི་མདུན་ལ་ལོ་ངོ་གསུམ་ཙམ་བཞུགས་ནས་རྫོགས་ཆེན་རོང་ལུགས་ཀྱི་ཆོས་སྐོར་རྣམས་ལེགས་པར་གསན། དགུང་[1476]ལོ་བཅུ་དྲུག་པར་བླ་ཆེན་ཡོན་ཏན་གཟུངས་ཀྱི་ཞབས་ལ་གཏུགས་ཏེ་ཀུན་བྱེད་མདོ་བཅུ་དང་། སེམས་སྡེའི་རྩ་བ་བཅོ་བརྒྱད། རྣལ་འབྱོར་རིག་པའི་ཉི་མ། བསམ་གཏན་མིག་གི་སྒྲོན་མ། གདར་ཤ་དང་གཟེར་བུ། རྡོ་རྗེ་སེམས་དཔའི་ཞུས་ལན་ལ་སོགས་སྒོམ་ཡིག་ཕལ་ཆེར། སྙན་བརྒྱུད་སྐོར་ལུགས་རོང་ལུགས་ཁམས་ལུགས་ལ་སོགས་པ་བསམ་གྱིས་མི་ཁྱབ་པ་གསན་ཏེ་ཐོས་བསམ་གྱི་སྒྲོ་འདོགས་ཆོད་པར་མཛད། དེ་ནས་འུག་སྐད་དགོན་པ་དང་། སེ་སྦྲག་ཆོས་བཅས་བཟུང་སྟེ་སྐུ་བསོད་ཤིན་ཏུ་རྒྱས་ཤིང་ཐུགས་དགོངས་ནམ་མཁའ་ལྟ་བུ་ལ་ཐུགས་རྗེའི་ཉི་ཟླ་ལྟ་བུར་ཤར་ནས་སྙན་པའི་གྲགས་པས་ཕྱོགས་མཚམས་ཐམས་ཅད་དུ་ཁྱབ་ཅིང་། གདུལ་བྱའི་ཚོགས་བསམ་གྱིས་མི་ཁྱབ་པ་འདུས་ཏེ་བླ་མའི་ཞབས་ཏོག་དང་འགྲོ་བའི་དོན་རྒྱ་ཆེན་ལ་དཔག་ཏུ་མེད་པ་མཛད། སྒྲུབ་པ་ཉམས་ལེན་མཛད་པས་རྫོགས་ཆེན་རང་སྣང་རིས་མེད་ཀྱི་དགོངས་པ་ཤར་ནས་ས་རྡོ་རི་བྲག་ཐམས་ཅད་ལ་ཐོགས་མེད་དུ་བྱོན་ནུས་པ་བྱུང་། སྐུ་གསུང་ཐུགས་རྟེན་སོགས་ཤིན་ཏུ་མང་པོ་བཞེངས་པ་མཛད་ཅིང་སེམས་ཅད་དབུལ་ཞིང་ཕོངས་པ་ཀུན་གྱི་སྦྱིན་བདག་མཛད། བྱང་ཕྱོགས་ཀྱི་རྒྱུད་འདིར་རྩོད་མེད་དུ་གྲགས་པའི་སྐྱེས་ཆེན་དམ་པ་ཡིན། དེ་ནས་བསྟན་འགྲོའི་ཞབས་ཏོག་ལེགས་པར་གྲུབ་སྟེ། དགུང་ལོ་ལྔ་བཅུ་རྩ་གཅིག་པར་དགོངས་པ་ཆོས་དབྱིངས་སུ་གཤེགས། ཁོང་གི་སློབ་མ་གྲགས་ཆེ་བ་ནི་རྟ་སྟོན་ཇོ་ཡེས་དང་། མ་ཧཱ་ལྷུན་པོ། མཁས་པ་ཇོ་མན། དབུས་པ་ཇོ་བསོད། བཟང་སྟོན་ཧོར་གྲགས། གཉོས་སྟོན་བླ་མ་བཅས་ཡིན་ནོ། ། [1477]
- language:
- Tibetan