- rwa bsod nams dbang rgyal/
- ID:
- T192734
- རྭ་བསོད་ནམས་དབང་རྒྱལ (Tibetan, Tibetan script, Original)
- > rwa bsod nams dbang rgyal/ (Tibetan, Latin script, Transliteration-THL Extended Wylie Transliteration)
- > ra sönam wanggyel (Tibetan, Latin script, Transcription-THL Simplified Tibetan Transcription)
Other Dictionaries
2. gangs can mkhas grub rim byon ming mdzod
ཁོང་ནི་རབ་བྱུང་བཅུ་གཉིས་པའི་མེ་ཕོ་རྟ་ལོ་སྟེ་སྤྱི་ལོ 1726 ལོར་མདོ་སྨད་བཙན་མོ་སྣའི་མང་ངེ་ཞེས་པའི་རུས་སུ་སྐུ་འཁྲུངས། རབ་བྱུང་བཅུ་གསུམ་པའི་ཆུ་མོ་གླང་ལོ་སྟེ་སྤྱི་ལོ 1793 ལོར་སྐུ་[1649]གཤེགས། ཁོང་དགུང་ལོ་ཆུང་ངུའི་དུས་སུ་དབྱིག་ཀྱ་རབ་འབྱམས་པ་ངག་དབང་འཇམ་དབྱངས་ལས་རབ་ཏུ་བྱུང་ཞིང་བླ་བྲང་བཀྲ་ཤིས་འཁྱིལ་གྱི་ཆོས་སྒོར་ཞུགས། སྡེ་ཁྲི་བློ་བཟང་དོན་གྲུབ་དང་རིགས་པའི་སེང་ཆེན་བློ་བཟང་གནས་བརྟན་གཉིས་ལ་བསྟེན་ནས་བསྡུས་གྲྭ་བློ་རྟགས་དང་ཕར་ཕྱིན་བཅས་ལ་སྦྱངས་པས་རྩོད་པ་ལ་ཐོགས་པ་མེད་པའི་སྙན་གྲགས་ཐོབ། དེ་ནས་དབུས་སུ་བྱོན་ཏེ་འབྲས་སྒོ་མང་གྲྭ་ཚང་དུ་ཞུགས་ཤིང་གཞུང་བཀའ་པོད་ལྔ་ལ་ཐོས་བསམ་ནན་ཏན་དུ་མཛད། ལྷ་ལྡན་སྨོན་ལམ་ཆེན་མོའི་གྲྭ་སྐོར་མཛད་ཅིང་ཁྲི་ཆེན་ནམ་མཁའ་བཟང་གི་དྲུང་ནས་བསྙེན་པར་རྫོགས། སྟོད་རྒྱུད་གྲྭ་ཚང་དུ་ཕེབས་ཏེ་རྒྱུད་སྡེ་བཞིའི་གཞུང་ལུགས་དང་མན་ངག་མཐའ་དག་ལ མཁས་པར་སྦྱངས། པཎ་ཆེན་བློ་བཟང་དཔལ་ལྡན་ཡེ་ཤེས་དང་། ཁྲི་ཆེན་ནམ་མཁའ་བཟང་། ལྕང་སྐྱ་ཐམས་ཅད་མཁྱེན་པ། རྗེ་ངག་དབང་བྱམས་པ། སྟག་ཕུ་གྲུབ་པའི་དབང་ཕྱུག བྲག་རྒྱབ་དཔོན་སློབ་བློ་བཟང་ཆོས་འཕེལ་སོགས་ཀྱི་དྲུང་ནས་ཟབ་རྒྱས་ཀྱི་མན་ངག་མཐའ་ཡས་པ་གསན། དེ་ནས་བླ་བྲང་བཀྲ་ཤིས་འཁྱིལ་དུ་ཕེབས་ཏེ་གཞུང་བཀའ་པོད་ལྔ་དང་བསྡུས་གྲྭ་བཅས་པར་དམ་བཅའ་བཞག་པས་མཁས་པའི་ཡོན་ཏན་མངོན་དུ་གྱུར། རབ་བྱུང་བཅུ་གསུམ་པའི་ཆུ་མོ་སྦྲུལ་ལོ་སྟེ་སྤྱི་ལོ 1773 ལོར་བླ་བྲང་བཀྲ་ཤིས་འཁྱིལ་གྱི་གདན་སའི་ཁྲི་ལ་ཕེབས་ཏེ་ལོ་ལྔའི་རིང་དུ་གདན་ས་བསྐྱངས་ཤིང་ཐོས་བསམ་གླིང་ལ་བཅའ་ཡིག་ཟུར་དུ་བཞག ཚོགས་ཆེན་ལ་སྦྱིན་བདག་ཟུར་བ་མེད་སྐབས་ཐོས་བསམ་གླིང་ལ་གྲྭ་ཇ་སྟར་ཆགས་སུ་གཏོང་བའི་སྲོལ་[1650]བཙུགས། པོ་ཏི་ལྔའི་རྩོད་གྲྭ་ཧོར་ཁོངས་སུ་མི་ལུས་པའི་ཆེད་དུ་རྩོད་ཡིག་བཞག བསྡུས་གྲྭ་བ་རྣམས་སྤོབས་པ་སྐྱེ་བ་སོགས་ཀྱི་ཆེད་དུ་རྭ་སྟོད་ལྟར་བསྡུས་གྲྭའི་ཚོགས་ལངས་གསར་འཛུགས་མཛད། ཁྲི་ཟུར་ནས་འཆད་རྩོད་རྩོམ་གསུམ་དང་སྒྲུབ་པ་ཉམས་ལེན་གྱིས་དུས་འདའ་བའོ། དགུང་ལོ་རེ་བརྒྱད་པར་དགོངས་པ་ཆོས་དབྱིངས་སུ་གཤེགས། ཁོང་ནི་བླ་བྲང་བཀྲ་ཤིས་འཁྱིལ་གྱི་གདན་རབས་བཅོ་ལྔ་པ་ཡིན། ཁོང་གི་གསུང་རྩོམ་ནི《བསྡུས་གྲྭའི་རྣམ་གཞག》དང་། 《ལེགས་བཤད་སྙིང་པོའི་དཀའ་གནད་ཀྱི་ཟིན་བྲིས》། 《རྣམ་ཐར་སྒོ་གསུམ་གྱི་མཐའ་དཔྱོད》། 《འདུལ་བའི་སྤྱི་བསྟན་ལྗགས་ཞུས་ཀྱི་འཕྲོ་ཅན》བཅས་བཞུགས་སོ། །
- language:
- Tibetan