- dkyil khang
- ID:
- T223497
- དཀྱིལ་ཁང (Tibetan, Tibetan script, Original)
- > dkyil khang (Tibetan, Latin script, Transliteration-THL Extended Wylie Transliteration)
- > kyil khang (Tibetan, Latin script, Transcription-THL Simplified Tibetan Transcription)
Other Dictionaries
2. dung dkar bod rig pa'i tshig mdzod chen mo
བཀྲ་ཤིས་ལྷུན་པོའི་གྲྭ་ཚང་ཁག་བཞིའི་ནང་གི་གཅིག་ཡིན། ཏཱ་ལའི་བླ་མ་སྐུ་ཕྲེང་དང་པོ་དགེ་འདུན་གྲུབ་ཀྱི་དངོས་སློབ་དཔལ་ལྡན་ཆོས་སྐྱོང་གིས་མཚན་ཉིད་ཀྱི་འཆད་ཉན་མཛད་པ་ནས་འཕེལ་རྒྱས་བྱུང་སྟེ་གྲྭ་ཚང་ཟུར་དུ་ཆགས་པ་ཡིན། གྲྭ་ཚང་འདིའི་མཚན་ལ་དཀྱིལ་ཁང་གྲྭ་ཚང་ལེགས་བཤད་གླིང་ཟེར་ཞིང་། སྔོན་དུས་རྗེ་དགེ་འདུན་གྲུབ་ཞལ་བཞུགས་པའི་དུས་སུ་མི་ཚན་བཅུ་ཡོད་པའི་ཐོག་། པཎ་ཆེན་རིན་པོ་ཆེ་སྐུ་ཕྲེང་བཞི་པ་བློ་བཟང་ཆོས་རྒྱན་གྱི་སྐབས་གྲྭ་གྲངས་འཕར་ཏེ་མི་ཚན་དྲུག་བཅས་བསྡོམས་པའི་མི་ཚན་བཅུ་དྲུག་ཡོད་པ་ནི། ༡དཔེ་ཐུབ་མི་ཚན། ༢གུ་གེ༣་སྟག་མོ། ༤ལྷུན་རྩེ། ༥འདར་པ། ༦་མདངས་ཅན། ༧་ལ་ཁ། ༨་རི་མཁར། ༩་རོང་པ། ༡༠གནས་སྙིང(དེ་རྣམས་རྗེ་དགེ་འདུན་གྲུབ་པའི་དུས་སུ་བྱུང་བ)༡༡་བདེ་བ་ཅན་པ། ༡༢ཆོས་སྦུག༡༣་ཁལ་ཁ། ༡༤ཨོ་རྒྱན་རྫོང་པ། ༡༥་གློ་སྦུག༡༦་རྡོ་གདན་བཅས(དེ་རྣམས་པཎ་ཆེན་རིན་པོ་ཆེ་བློ་བཟང་ཆོས་རྒྱན་གྱི་སྐུ་དུས་སུ་གསར་འཕར་བྱུང)ཡིན། སློབ་གཉེར་གནང་སྐབས་ཀྱི་གཙོ་བོའི་ཡིག་ཆ་ནི། ཁྲི་ཆེན་སྨོན་ལམ་དཔལ་བས་མཛད་པའི《རྣམ་འགྲེལ》ལེའུ་བཞི། འདུལ་འཛིན་བློ་གྲོས་སྦས་པས་མཛད་པའི《རྣམ་འགྲེལ》ལེའུ་བཞིའི་སྤྱི་དོན་དང《རྣམ་འགྲེལ》ལེའུ་དང་པོ་དང་ལེའུ་གཉིས་པའི་མཐའ་དཔྱོད། རྗེ་བསྟན་པ་དར་བཟང་གིས་མཛད་པའི《རྣམ་འགྲེལ་ལུང་རིགས་གཏེར་མཛོད》དང་《ཕར་ཕྱིན་སྤྱི་དོན་དཀའ་གནས་གསལ་བྱེད》ཀུན་མཁྱེན་ལེགས་པ་དོན་གྲུབ་ཀྱིས་མཛད་པའི《ཕར་ཕྱིན་སྤྱི་དོན། 》ཤནྟི་པ་བློ་གྲོས་རྒྱལ་མཚན་གྱིས་མཛད་པའི《དབུ་མའི་སྤྱི་དོན་དོན་གསལ》དང《དབུ་མའི་མཐའ་གཅོད་ལེགས་བཤད་སྣང་བྱེད》དང《འདུལ་བ་ལུང་རིགས་ཉི་མ》པཎ་ཆེན་བདེ་ལེགས་ཉི་མས་མཛད་པའི《མཛོད་ལུང་རིགས་གཏེར་མཛོད》སོགས་ཡིན། གྲྭ་ཚང་འདིའི་གདན་རབས་ནི་སློབ་དཔོན་དཔལ་ལྡན་ཆོས་སྐྱོང་། འཕགས་པ་འཆར་ཀ་། སངས་རྒྱས་དཔལ། སངས་རྒྱས་དབང་ཕྱུག་། དྲུང་ཆོས་ཀྱི་གྲགས་པ། མངའ་རིས་ལྷ་བཙུན་བློ་བཟང་བསྟན་པའི་རྒྱལ་མཚན། ཤནྟི་བློ་གྲོས་རྒྱལ་མཚན། གྲགས་ཆེན་དཔལ་འབར། རྗེ་བསྟན་པ་དར་བཟང་། མཁས་པ་བློ་གྲོས་རྒྱ་མཚོ། ཞལ་སྔ་ནས་བློ་གྲོས་ལེགས་པ། ཆོས་དཔལ་རྒྱ་མཚོ་། བསམ་འགྲུབ་དཔལ་བཟང་། ཀུན་མཁྱེན་ནོར་བཟང་རྒྱ་མཚོ་། རྗེ་བློ་གྲོས་པ། སངས་རྒྱས་རྒྱ་མཚོ། ཇོ་རྫོང་པ་བློ་བཟང་བསྟན་པའི་རྒྱལ་མཚན། དཔེ་ཐུབ་པ་སངས་རྒྱས་དཔལ། ཟངས་མཁར་བ་སངས་རྒྱས་བཟང་པོ། གུ་གེ་བ་འཇམ་དབྱངས་རྒྱལ་མཚན། ཞལ་སྔ་ནས་བརྩོན་འགྲུས་རྒྱལ་མཚན། ཞལ་སྔ་ནས་ཆོས་དཔལ་རྒྱལ་མཚན། ཞལ་སྔ་ནས་བློ་བཟང་མགོན་པོ། མགོན་པོ་དཔལ་བཟང་། བློ་བཟང་བཀྲ་ཤིས། སྟག་མོ་བ་ཡེ་ཤེས་རྒྱ་མཚོ། དཔལ་འབྱོར་རྒྱ་མཚོ། བདེ་ཆེན་པ་བློ་བཟང་ཆོས་འཕེལ། བློ་བཟང་བརྩོན་འགྲུས། ཡེ་ཤེས་ཚེ་བརྟན། གུ་གེ་བ་བློ་བཟང་བསྟན་འཇིན། ཞལ་སྔ་ནས་བློ་བཟང་རྣམ་རྒྱལ་སོགས་རིམ་པར་བྱོན། གྲྭ་ཚང་འདིར་བཞུགས་པའི་རྟེན་གསུམ་གྱི་སྐོར་ཕུར་བུ་ལྕོག་རྗེ་ངག་དབང་བྱམས་པས་མཛད་པའི《གདན་ས་ཆེན་པོ་བཞི་དང་རྒྱུད་པ་སྟོད་སྨད་ཀྱི་དཀར་ཆག》དེང་སྐབས་ལྕགས་དཔར་དུ་དཔར་སྐྲུན་བྱས་ཡོད་པར་གཟིགས།
- language:
- Tibetan