- rgyal mkhan po grags pa rgyal mtshan
- ID:
- T228133
- རྒྱལ་མཁན་པོ་གྲགས་པ་རྒྱལ་མཚན (Tibetan, Tibetan script, Original)
- > rgyal mkhan po grags pa rgyal mtshan (Tibetan, Latin script, Transliteration-THL Extended Wylie Transliteration)
- > gyal khenpo drakpa gyaltsen (Tibetan, Latin script, Transcription-THL Simplified Tibetan Transcription)
Other Dictionaries
1. Thupten Phuntsok Dictionary
མདོ་སྨད་ལྷོ་རྒྱུད་འབོ་རའི་རྒྱ་སྒར་ཐང་ཞེས་པར་ཡབ་ཡུམ་སྐྱབས་དང་ཡུམ་ལྷ་མོ་མཚོ་གཉིས་ཀྱི་སྲས་སུ་རབ་བྱུང་བཅུ་གསུམ་པའི་ཆུ་རྟ (༡༧༦༢) ལོར་སྐུ་འཁྲུངས། དགུང་ལོ་བདུན་པ་ནས་བཟུང་མང་དགེ་སློང་ཚུལ་ཁྲིམས་རྒྱ་མཚོ་ལས་ཡིག་ཀློག་དང་འདོན་ཆོས་བསླབས། དགུང་ལོ་བཅུ་གཅིག་པར་སེ་ར་དཔོན་སློབ་བློ་བཟང་ཆོས་འཕེལ་ལས་རབ་ཏུ་བྱུང། མཚན་བློ་བཟང་དོན་གྲུབ་ཅེས་གསོལ། དགུང་ལོ་དོན་དྲུག་ལ་ཕེབས་པ་རབ་བྱུང་བཅུ་བཞི་པའི་མེ་བྱ (༡༨༣༧) ལོར་སྐུ་གཤེགས།
- language:
- Tibetan
2. gangs can mkhas grub rim byon ming mdzod
ཁོང་ནི་རབ་བྱུང་བཅུ་གསུམ་པའི་ཆུ་ཕོ་རྟ་ལོ་སྟེ་སྤྱི་ལོ 1762 ལོར་མདོ་སྨད་ལྷོ་རྒྱུད་ཀྱི་སའི་ཆ་འབོ་རའི་རྒྱ་སྒར་ཐང་[དེང་ཞཱ་ཧྭོ་རྫོང་གི་ཁོངས་འབོ་ར་ཞང་] དུ་ཡབ་ཡུམ་སྐྱབས་དང་། ཡུམ་ལྷ་མོ་འཚོ་གཉིས་ཀྱི་སྲས་སུ་སྐུ་འཁྲུངས། རབ་བྱུང་བཅུ་བཞི་པའི་མེ་མོ་བྱ་ལོ་སྟེ་སྤྱི་ལོ 1837 ལོར་སྐུ་གཤེགས། དགུང་ལོ་བདུན་པར་མང་ངེ་དགེ་སློང་ཚུལ་ཁྲིམས་རྒྱ་མཚོའི་དྲུང་ནས་ཡི་གེའི་འབྲི་ཀློག་དང་འདོན་ཆོས་འགར་བསླབས། དགུང་ལོ་བཅུ་གཅིག་པར་སེ་ར་དགེ་བཤེས་བློ་བཟང་ཆོས་འཕེལ་ལས་རབ་ཏུ་བྱུང་ཞིང་མཚན་བློ་བཟང་དོན་གྲུབ་ཅེས་གསོལ། དགུང་ལོ་བཅུ་གཉིས་པར་བླ་བྲང་བཀྲ་ཤིས་འཁྱིལ་དུ་ཕེབས་ཏེ་ཆོས་གྲྭར་ཞུགས། བསྡུས་གྲྭ། བློ་རྟོགས། རྟགས་རིགས་རང་ལུགས། གྲུབ་མཐའ་རིན་ཆེན་ཕྲེང་བ་སོགས་ཚོགས་རྒྱུགས་ཕུལ། དགུང་ལོ་བཅུ་དྲུག་པར་དཔོན་སློབ་བསོད་ནམས་གྲགས་པ་ལས་དགེ་ཚུལ་གྱི་སྡོམ་པ་མནོས། ཀུན་མཁྱེན་འཇིགས་མེད་དབང་པོས་སྒོ་མང་བླ་མ་སངས་རྒྱས་རྡོ་རྗེའི་ཡང་སྲིད་དུ་ངོས་འཛིན་མཛད་དེ་བླ་བྲང་ནང་དུ་སྤྲུལ་པའི་སྐུའི་གདན་ཁྲིར་བཀོད། དགུང་ལོ་ཉེར་གཅིག་པར་ཀུན་མཁྱེན་གྱི་དྲུང་ནས་བསྙེན་པར་རྫོགས་ཤིང་མཚན་གྲགས་པ་རྒྱལ་མཚན་ཞེས་གསོལ། དགུང་ལོ་ཉེར་གཉིས་པར་དབུས་སུ་ཕེབས་ཏེ་འབྲས་སྤུངས་སྒོ་མང་གི་ཆོས་གྲྭར་ཞུགས་ཏེ་ཧོར་སྐལ་བཟང་དངོས་གྲུབ་དང་གུང་ཐང་བསྟན་པའི་སྒྲོན་མེ་དགེ་རྒན་དུ་བསྟེན་ནས་སློབ་གཉེར་གྱི་རྒྱུན་བསྐྱངས་ཏེ་སྒོ་མང་གི་ཚོགས་དབུས་སུ་[378]གཞུང་བཀའ་པོད་ལྔའི་དམ་བཅའ་བཞག དགུང་ལོ་ཉེར་ལྔ་བར་སྡེ་བ་གཞུང་གི་བཀའ་ལྟར་ཆོས་འཁོར་རྒྱལ་གྱི་མཁན་པོ་མཛད། དེ་ནས་མི་རིང་བར་ལྷ་ལྡན་སྨོན་ལམ་ཆེན་མོར་གདན་ས་གསུམ་གྱི་དགེ་བའི་བཤེས་གཉེན་གྱི་མདུན་དུ་དམ་བཅའ་བཞག་ནས་ལྷ་རམས་པའི་མཚན་རྟགས་ཨང་དང་པོ་བཞེས་སོ། དགུང་ལོ་ཉེར་དགུ་བར་མདོ་སྨད་དུ་ཕེབས་ཏེ་བླ་བྲང་མཁན་པོ་མཛད་དེ་དགོན་པར་རྟེན་གསར་བཞེངས་མཛད། དགུང་ལོ་བཞི་བཅུ་བར་བཀྲ་ཤིས་འཁྱིལ་གྱི་ཚོགས་ཆེན་ཁྲི་བར་མངའ་གསོལ་མཛད་པས་བླ་བྲང་བཀྲ་ཤིས་འཁྱིལ་གྱི་གདན་རབས་ཉེར་གསུམ་པ་ཡིན། ཁོང་གི་གསུང་རྩོམ་ནི《བྱང་ཆུབ་སེམས་པའི་སྤྱོད་པ་ལ་འཇུག་པའི་འགྲེལ་བ་རིན་པོ་ཆེའི་ཕྲེང་བ》སོགས་ཁྱོན་བསྡོམས་བསྟན་བཅོས་དགུ་བཅུ་གོ་ལྔ་ཙམ་ཡོད་པ་ཕྱོགས་གཅིག་ཏུ་དྲིལ་ཏེ་པོ་ཏི་དྲུག་ལྷག་ལོངས་པའི་པར་ཤིང་བླ་བྲང་དུ་བཏབ་ཡོད། ཁོང་གིས་སྐུ་ཚེ་གང་བོར་འཆད་རྩོད་རྩོམ་གསུམ་གྱིས་དུས་འདའ་བ་མཛད་ཅིང་། གསུང་གི་བདུད་རྩི་ཕྱོགས་མེད་དུ་སྤེལ་ཏེ། བུ་སློབ་མང་པོ་བཀའ་དྲིན་གྱིས་བསྐྱངས་སོ།
- language:
- Tibetan