- jun gar tshe dbang rab brtan
- ID:
- T230414
- ཇུན་གར་ཚེ་དབང་རབ་བརྟན (Tibetan, Tibetan script, Original)
- > jun gar tshe dbang rab brtan (Tibetan, Latin script, Transliteration-THL Extended Wylie Transliteration)
- > jün gar tsewang rabten (Tibetan, Latin script, Transcription-THL Simplified Tibetan Transcription)
Other Dictionaries
1. dung dkar bod rig pa'i tshig mdzod chen mo
འདི་ནི་སྔར་སོག་པོའི་དམག་དཔོན་དགའ་ལྡན་བྱ་བའི་གཅེན་པོའི་བུ་ཡིན། རབ་བྱུང་བཅུ་གཉིས་པའི་མེ་སྤྲེལ（༡༧༡༦）ལོར་ཇུན་གར་ཚེ་དབང་རབ་བརྟན་ནས་དམག་དཔོན་ཆེན་པོ་ཚེ་རིང་དོན་གྲུབ་ཀྱིས་གཙོ་བོར་བྱས་པའི་སོག་དམག་དྲུག་སྟོང་བོད་དུ་བཏང་། མེ་བྱ（༡༧༡༧）ལོར་དམག་དཔུང་འདམ་དུ་འབྱོར་ཏེ་དེར་དམག་འཐབ་ལན་འགའ་བྱས་ཀྱང་མ་ཐུབ་པས་ལྷ་བཟང་དཔུང་དང་བཅས་པ་བྲེལ་རྟབ་ཀྱིས་ལྷ་སར་ཐོན་ནས་རྩེ་ཕོ་བྲང་གི་ཆབ་སྒོ་རྣམས་བསྡམས་ཏེ་བསྡད། དེ་དུས་ཀྱི་དམག་དཔོན་ཆེ་བ་ནི་དབུས་མདའ་དཔོན་ཨོ་རོང་པ་དང་། འབུམ་ཐང་པ་འདས་པོའི་བུ་གཉིས། གཙང་དཔུང་གི་དམག་དཔོན་དུ་ཕོ་ལྷ་ཐའི་ཇི་བསོད་ནམས་སྟོབས་རྒྱས། བསམ་གྲུབ་གླིང་པ། བཀྲ་ཤིས་རྩེ་པ། སོག་དཔུང་གི་དམག་དཔོན་དུ་རལ་ཐའི་ཇི་བཅས་ཡིན། ལོ་དེའི་ཟླ་བ་བཅུ་གཅིག་པའི་ཚེས་བཅུ་གསུམ་ཉིན་ཇུན་གར་དམག་ལྷ་སར་འཛུལ། བོད་དམག་སྲུང་བྱ་རྣམས་ཀྱིས་གླགས་མ་རྙེད་པར་ཁ་ཐོར། ཕོ་ལྷ་བའང་འབྲས་སྤུངས་ལ་བྲོས། ཇུན་དམག་གིས་གྲོང་ཁྱེར་ནང་བཅོམ་འཕྲོག་ཚོད་མེད་བྱས། ཟླ་བ་བཅུ་གཉིས་པའི་ཚེས་གསུམ་ཉིན་ཇུན་དམག་གིས་རྩེ་ཕོ་བྲང་གི་ལྷོ་ཕྱོགས་ནས་འཛུལ་ཐབས་བྱས་ཀྱང་ཐར་དཀའ་བས་རྒྱལ་སྒོར་མེ་རྒྱག་རྩིས་བྱེད་སྐབས་ལྷ་བཟང་ཁང་རང་ཉིད་དང་། ཞབས་འབྲིང་བློ་བཟང་ཆོས་འཕེལ་གཉིས་ལྟག་རྒྱབ་ནས་རྟ་བཞོན་ཏེ་བྲོས་འགྲོ་སྐབས་རྟ་འདམ་ལ་བྱིངས་ཏེ་འགྲོ་མ་ཐུབ་པའི་ངང་རྗེས་འདེད་ཇུན་དམག་འབྱོར་བ་དང་ལག་འཛིངས་ཀྱིས་དམག་མི་ཁ་ཤས་བསད་མཐར་ཁོང་གཉིས་ཇུན་དམག་གིས་ལག་རུབ་བརྒྱབ་སྟེ་བཀྲོངས། དེའི་ཚེ་ཇུན་གར་བའི་དཔུང་གི་གཙོ་བོ་རྣམས་གྲོས་ཏེ་དགུང་ན་མཐོན་པོར་ཕེབས་པ་བྱེ་རི་སྟག་རྩེའི་ཞབས་དྲུང་ལྷ་རྒྱལ་རབ་བརྟན་བོད་ཀྱི་སྲིད་སྐྱོང་བའི་ཁྲིར་བསྐོས། དེ་ནས་པོ་ཏ་ལའི་རྣམ་རྒྱལ་གྲྭ་ཚང་གི་དགེ་འདུན་ཚང་མ་སྐྱིད་ཆུའི་ཁར་འཁྲིད་ནས་ན་བཟའ་རྣམས་བཤུས། སྐྱ་ཆས་གཡོགས་ཏེ་སོ་སོའི་གཞིས་དང་ཕ་མིང་གར་ཡོད་སར་བཏང་། རྡོ་རྗེ་བྲག་དང་སྨིན་གྲོལ་གླིང་གི་བླ་མ་གཙོ་བོ་རྣམས་དང་། ལྷ་བཟང་གི་ཞབས་འབྲིང་གཙོ་ཆེ་བ་རྣམས་བཟུང་སྟེ་བཙོན་དུ་བཅུག གཞུང་ཞབས་རྣམས་བསྐོངས་ཏེ་པད་དཀར་འཛིན་པ་ངག་དབང་ཡེ་ཤེས་རྒྱ་མཚོ་རྒྱལ་དབང་ལྔ་པ་ཆེན་པོའི་ཡང་སྲིད་ཡིན་མིན་འདྲི་རྩད་བྱས་པར་ཚང་མས་འདོད་གཅིག་གིས་མིན་པར་ཐག་བཅད་པས་ཁྲི་ལས་ཕབ་སྟེ་ལྕགས་པོ་རིར་དོ་དམ་བཀག་ཉར་བྱས། ཟླ༡༢ཚེས༢༤ཉིན་བླ་བྲང་སྟེང་དུ་དབུས་གཙང་གི་བླ་དཔོན་རྣམས་བསྐོངས་ཐོག ཇུན་གར་གྱི་བློན་ཆེན་ཚེ་རིང་དོན་གྲུབ་དང་། གདུགས་དཀར། ཆོས་འཕེལ་ཇའི་སང་གསུམ་བཅས་ནས་སླད་ཕྱིན་གསང་སྔགས་རྙིང་མའི་ཆོས་རྩ་བ་ནས་བྱས་མི་ཆོག་པ་དང་། སྐུ་གསུང་ཐུགས་རྟེན་རྣམས་དོར་དགོས་པའི་ཁྲིམས་བསྒྲགས། དེ་ནུབ་སྨིན་གླིང་ལོ་ཆེན་ངྷརྨ་ཤྲཱི་དང་། རྡོ་རྗེ་འཛིན་པ་བློ་བཟང་བསྟན་པའི་རྒྱལ་མཚན། གདུང་སྲས་པདྨ་འགྱུར་མེད་རྒྱ་མཚོ་སོགས་སྐྱིད་ཆུའི་འགྲམ་དུ་འཁྲིད་དེ་བཀྲོངས། ལོ་ཆེན་རིན་པོ་ཆེ་གནས་ཚང་ནས་ཕྱིར་ཕེབས་པ་དང་སྦྲགས་ཞལ་འདོན་དབུ་ཚུགས་ཤིང་། ལྕགས་པོ་རིའི་རྒྱབ་ཏུ་ཕེབས་དུས་སྨོན་ལམ་འདེབས་པ་ཡིན་པས་ཅུང་ཞོགས་གསུངས་ནས་དེ་ཁར་ཞིང་ལ་གཤེགས། དེ་ནས་མ་འགྱངས་བར་སྨིན་གླིང་གདུང་སྲས་སྐུ་གཞོན་དང་། ཕྱག་མཛོད་ཞབས་དྲུང་ལེགས་གྲུབ། རྡོ་བྲག་རིག་འཛིན་ཆེན་མོ་པདྨ་འཕྲིན་ལས། ལྷ་བཟང་ཁང་གི་གཞུང་ཞབས་གཙོ་གྲས་བུ་ཆུང་དང་། དངོས་གཞི་བ། པདྨ་ཚེ་རིང་། རྒྱལ་རྩེ་ལྕང་ལོ་ཅན་པ་སོགས་བཀྲོངས། ཨོ་རྒྱན་སངས་རྒྱས་གཉིས་པའི་སྒྲུབ་གནས་མང་པོའི་སྒོ་བརྩིགས་ནས་བཀག རྡོ་རྗེ་བྲག་དགོན་པ་དང་། སྨིན་གྲོལ་གླིང་། ཆུ་ཤུལ་ཐར་པ་གླིང། གསང་སྔགས་བྱང་ཆུབ་གླིང་སོགས་རྙིང་ལུགས་ཀྱི་དགོན་པ་མང་པོ་རྨེག་མེད་དུ་བཏང་། སྨིན་གྲོལ་གླིང་གི་ཕྱག་དཔེ་ཡོད་ཚད་ས་ཕུང་ལྟར་སྤུངས་ནས་དེ་སྟེང་ཕར་འགྲོ་ཚུར་འགྲོ་བྱེད་བཅུག གདན་ས་གསུམ་དང་བཀྲ་ཤིས་ལྷུན་པོ་བཅས་ཀྱི་འདབས་གནས་གྲོང་རྣམས་རྒྱང་རིང་པོར་བཤིག་སྤོ་བྱེད་བཅུག་པ་སོགས་བརྡབ་གསིག་ཆེན་པོ་བྱུང་། ཇུན་གར་བའི་དཔོན་དམག་རྣམས་ཀྱིས་བོད་དབུས་གཙང་ཁུལ་དུ་རང་སྣང་གང་དྲན་གྱི་དབང་སྒྱུར་ལོ་གསུམ་ཙམ་བྱས་རིང་དགེ་ལུགས་པར་རྒྱབ་སྐྱོར་ཡིན་ཁུལ་ཤོད་མཁས་ཙམ་ལས། རྙིང་མའི་བསྟན་པ་ལ་ཧ་ཅང་གི་སྡང་ཟུག་ཆེན་པོ་བྱས་ཏེ་གཏོར་བརླག་ཚབས་ཆེན་བཏང་མཐར་ཁང་ཆེན་ནས་དང་། ཕོ་ལྷ་ནས། སྡེ་པ་ང་ཕོད་སོགས་ཀྱིས་ཇུན་གར་བར་ངོ་རྒོལ་བྱས་པས་ཇུན་གར་དཔོན་དམག་རྣམས་སྡོད་ཐབས་མེད་པར་འཕགས་མཆོག་ལོ་ཀེ་ཤྭ་རེས་དབུས་སྐུ་གསུང་ཐུགས་རྟེན་སོགས་བོད་ཀྱི་དངོས་ནོར་ཁྱད་འཕགས་ཕོན་ཆེ་འཁྱེར་ཏེ་རབ་བྱུང་བཅུ་གཉིས་པའི་ལྕགས་བྱི（༡༧༢༠）ལོར་ཕྱིར་འཐེན་བྱས། ནག་ཚང་བརྒྱུད་ཐོན་པའི་ཇུན་དམག་རྣམས་ཁང་ཆེན་ནས་ཀྱིས་རྗེས་འདེད་བཏང་སྟེ་ཇུན་དམག་མང་པོ་བསད། འཕགས་མཆོག་ལོ་ཀེ་ཤྭ་རེ་དང་རྩ་ཆེའི་དངོས་ནོར་ཁྱད་འཕགས་མང་པོ་ཚུར་བླངས་སོ། །
- language:
- Tibetan
2. Thupten Phuntsok Dictionary
འདི་ནི་སྔར་སོག་པོའི་དམག་དཔོན་དགའ་ལྡན་བྱ་བའི་གཅེན་པོའི་བུ་ཡིན། རབ་བྱུང་བཅུ་གཉིས་པའི་མེ་སྤྲེལ (༡༧༡༦) ལོར་ཇུན་གར་ཚེ་དབང་རབ་བརྟན་དམག་དཔོན་ཆེན་པོ་ཚེ་རིང་དོན་གྲུབ་ཀྱིས་གཙོ་བོར་བྱས་པའི་སོག་དམག་དྲུག་སྟོང་བོད་དུ་བཏང་། མེ་བྱ (༡༧༡༧) ལོར་དམག་དཔུང་འདམ་དུ་འབྱོར་ཏེ་དེར་དམག་འཐབ་ལན་འགའ་བྱས་ཀྱང་མ་ཐུབ་པས་ལྷ་བཟང་དཔུང་དང་བཅས་པ་བྲེལ་རྟབ་ཀྱིས་ལྷ་སར་ཐོན་ནས་རྩེ་ཕོ་བྲང་གི་ཆབ་སྒོ་རྣམས་བསྡམས་ཏེ་བསྡད། དེ་ཕྱོགས་ལོ་རྒྱུས་རྒྱས་པ་དུང་དཀར་ཚིག་མཛོད་དུ་གཟིགས་པས་རྟོགས།
- language:
- Tibetan