- rje btsun mi la ras pa
- ID:
- T230628
- རྗེ་བཙུན་མི་ལ་རས་པ (Tibetan, Tibetan script, Original)
- > rje btsun mi la ras pa (Tibetan, Latin script, Transliteration-THL Extended Wylie Transliteration)
- > jetsün mi la repa (Tibetan, Latin script, Transcription-THL Simplified Tibetan Transcription)
Other Dictionaries
1. dung dkar bod rig pa'i tshig mdzod chen mo
མར་པའི་སློབ་མ་ཀ་ཆེན་བཞི་པའི་ཡ་གྱལ་བྱང་གི་ཀ་ཆེན། རྗེ་འདི་ཉིད་རབ་བྱུང་དང་པོའི་ལྕགས་འབྲུག（༡༠༤༠）ལོར་ཡབ་མི་ལ་ཤེས་རབ་རྒྱལ་མཚན་དང་ཡུམ་མྱང་ཚ་དཀར་རྒྱན་གཉིས་ཀྱི་སྲས་སུ་མང་ཡུལ་གུང་ཐང་གི་སྐྱ་རྔ་རྩ་རུ་སྐུ་འཁྲུངས། སྐུ་ཆུང་ངུའི་སྐབས་མཚན་ལ་ཐོས་པ་དགའ་ཞེས་ཞུ། ཁོང་སྐུ་བལྟམས་ནས་ཡུན་རིང་མ་སོང་བར་ཡབ་སྐུ་གཤེགས་པས་ཨ་ཁུ་དང་ཨ་ནེས་སྡུག་པོ་ཚད་མེད་བཏང་། དེ་རྗེས་ཡུམ་གྱི་བཀའ་བཞིན་མཐུ་བསླབས་ནས་འཁོན་གླན་པར་མི་མང་པོ་བསད། སླད་ནས་སྡིག་པ་ལ་འགྱོད་དེ་ཆོས་བྱེད་པར་ས་རྟ（༡༠༧༨）ལོར་ལྷོ་བྲག་ཏུ་ཕེབས་ཏེ་མར་པ་ལོ་ཙཱ་བ་ཆོས་ཀྱི་བློས་གྲོས་དང་མཇལ། མར་པས་མི་ལར་འདི་རྐོས་ཤིག་གསུངས་པ་ལྟར་བཀའ་ཐོག་མ་བསྒྲུབས། སྐྱེམས་ཆང་གནང་བ་གཙང་མར་བཞེས་པས་གདམས་ངག་གི་སྣོད་དུ་དགོངས་ནས་རྗེས་སུ་བཟུང། སྡིག་སྒྲིབ་སྦྱོང་བའི་སླད་དུ་སྐུ་མཁར་ཟླུམ་པོ། སོག་ཀ ཟླ་གམ། གྲུ་གསུམ་རྣམས་རྩིག་བཅུག་པ་སླར་ཡང་བཤིག མཐར་སྲས་མཁར་དགུ་ཐོག་ཅེས་སུ་གྲགས་པ་གྲུ་བཞི་དགུ་ཐོག་རྩེ་མོ་རིན་པོ་ཆེ་འབར་བ་ལྟ་བུ་རྩིགས་གསུངས་ནས་མདོ་ཁྱམས་དབུ་རྩེ་དང་བཅས་པ་བརྩིགས་པར་མཛད། གཞན་ཡང་དབང་གྲལ་ནས་ལན་མང་བཏོན་པ་སོགས་ཡིད་ཆད་ཆེན་པོ་བདུན་གྱིས་སྒྲིབ་པ་སྦྱངས་ཏེ་བླ་མ་མར་པའི་དྲུང་དུ་ལོ་དྲུག་ཟླ་བ་བརྒྱད་ཙམ་བཞུགས་ནས་དཀའ་བ་ཚད་མེད་སྤྱད་མཐར་དབང་དང་གདམས་ངག་རྫོགས་པར་བཞེས། ལྷ་དང་བླ་མས་གསང་མཚན་བཞད་པའི་རྡོ་རྗེ་ཞེས་བཏགས་པར་གྲགས། བླ་མའི་སྐུ་མདུན་ནས་ཞལ་བྲལ་ཁར། བླ་མས། ཁྱོད་ལ་བྱིན་དང་གཞན་ལ་བྱིན། །གལ་ཏེ་སྲང་ལ་བཅལ་ཡོད་ན། །སུམ་འགྱུར་བས་ཀྱང་མི་ལྷག་རི། །ཞེས་འཁོད་པའི་ཤོག་དྲིལ་ཐམ་ག་བརྒྱབ་པ་ཞིག་གནང་སྟེ་སྡུག་ཐུག་པའི་དུས་འདིར་ལྟོས། དེ་བར་མ་ལྟ་གསུངས་ནས་བསྟན་པ་གཏད། ཆོས་ལ་ཞེས་པའི་བར་སྐྱེལ་ཐུང་མཛད་དེ་སྤྱི་བོར་ཕྱག་བཞག་ནས་སྨོན་ལམ་དང་གནས་དང་རྒྱུད་འཛིན་ལ་སོགས་པའི་མ་འོངས་ལུང་བསྟན་དུ་མ་མཛད། དགུང་ལོ་ཞེ་ལྔ་པ་ཤིང་བྱི(༡༠༨༤)ལོར་སྟོད་ཕྱོགས་སྐྱིད་གྲོང་དང་གཉའ་ནང་ཁུལ་དུ་ཕེབས་ཤིང་སྒྲུབ་པའི་དམ་བཅའ་མཛད་དེ་ལོ་དགུའི་རིང་ན་བཟའ་རས་རྐྱང་དང་ཟས་ཟྭ་ཚོད་ཙམ་ལ་བརྟེན་པ་སོགས་དཀའ་སྤྱད་དྲག་པོས་བསྒོམས་པས་སྐུ་ཚེ་འདི་ཉིད་ལ་མཆོག་གི་དངོས་གྲུབ་ཐོབ། དེ་ནས་ཕྱོགས་གཞན་དུ་འབྱོན་བཞུད་འཛད་དེ་སྣོད་དུ་རུང་བའི་སློབ་མ་རྣམས་ལ་གསང་སྔགས་ཀྱི་གདམས་པ་ཅི་རིགས་གནང་བ་སོགས་སྙན་པའི་གྲགས་པ་ས་ཕྱོགས་ཀུན་ཏུ་ཁྱབ་ཅིང་། སྒྲུབ་བརྒྱུད་ཀྱི་བསྟན་པའི་སྲོལ་བཙུགས། ཉམས་མགུར་མང་དུ་བརྩམས་གཤིས་རྗེས་རབས་པས《རྗེ་བརྩུན་མི་ལ་རས་པའི་རྣམ་ཐར་རྒྱས་པར་ཕྱེ་བ་མགུར་འབུམ》ཞེས་བྱ་བར་བསྒྲིགས། མཐར་ཐུགས་ཀྱི་སྲས་མཆོག་རྗེ་སྒམ་པོ་བ་ལ་བསྟན་པ་གཏད་དེ་དགུང་ལོ་གྱ་བཞི་པ་རབ་བྱུང་གཉིས་པའི་ཆུ་ཡོས(༡༡༢༣)ལོར་སྐུ་གཤེགས། སློབ་མའི་མཆོག་ནི་རྗེ་སྒམ་པོ་བ་དང་། རས་ཆུང་པ། དེ་བཞིན་འབྲི་སྒམ་རས་པ། སེ་བན་རས་པ། རས་པ་ཞི་བ་འོད། ཁྱི་ར་རས་པ། ངན་རྫོང་རས་པ། བདེ་བ་སྐྱོང་། ར་རྫི་རས་པ་སྟེ་རས་པ་མཆེད་བརྒྱད། སྟོན་པ་དྲུག རས་མ་བཅུ་གཉིས། གྲུབ་ཐོབ་མ་དྲུག་སོགས་བགྲངས་ཀྱིས་མི་ལང་ངོ་། །རྣམ་ཐར་ལོ་རྒྱུས་རྒྱས་པ་ཡོངས་གྲགས་ནི་གཙང་སྨྱོན་ཧེ་རུ་ཀ་སངས་རྒྱས་རྒྱལ་མཚན་གྱིས་རབ་བྱུང་བརྒྱད་པའི་ཤིང་ཡོས(༡༤༩༥)ལོར་བརྩམས་པ་དང་། ཡང་རི་བོ་ཆེ་ཆོས་རྗེ་མི་གཡོ་མགོན་པོའི་སློབ་མ་རྟ་ཚག་པ་ཚེ་དབང་རྒྱལ་གྱིས་རབ་བྱུང་བརྒྱད་པའི་མེ་ཡོས(༡༤༤༧)ལོར་བརྩམས་པའི《ལྷོ་རོང་ཆོས་འབྱུང་ཐུབ་བསྟན་གསལ་བྱེད》ཀྱི་ནང་གོང་གི་རྣམ་ཐར་ནང་མི་གསལ་བའི་ལོ་རྒྱུས་མང་ཙམ་འདུག་པས་དེ་དག་ཏུ་གཟིགས་པར་ཞུ།
- language:
- Tibetan
2. Thupten Phuntsok Dictionary
མར་པའི་སློབ་མ་ཀ་ཆེན་བཞིའི་ཡ་གྱལ་བྱང་གི་ཀ་ཆེན། རྗེ་འདི་ཉིད་རབ་བྱུང་དང་པོའི་ལྕགས་འབྲུག (༡༠༤༠) ལོར་ཡབ་མི་ལ་ཤེས་རབ་རྒྱལ་མཚན་དང་ཡུམ་མྱང་ཚ་དཀར་རྒྱན་མ་གཉིས་ཀྱི་སྲས་སུ་མང་ཡུལ་གུང་ཐང་གི་སྐྱ་རྔ་རྩ་རུ་སྐུ་འཁྲུངས། སྐུ་ཆུ་ངུའི་སྐབས་མཚན་ལ་ཐོས་པ་དགའ་ཞེས་ཞུ། ཁོང་སྐུ་བལྟམས་ནས་ཡུན་རིང་མ་སོང་བར་ཡབ་སྐུ་གཤེགས་པས་ཨ་ཁུ་དང་ཨ་ནེས་སྡུག་པོ་ཚད་མེད་བཏང་། ལྷ་དང་བླ་མས་གསང་མཚན་བཞད་པའི་རྡོ་རྗེ་ཞེས་བཏགས་པར་གྲགས། མཐར་ཐུགས་ཀྱི་སྲས་མཆོག་རྗེ་སྒམ་པོ་བ་ལ་བསྟན་པ་གཏད་དེ་དགུང་ལོ་གྱ་བཞི་པ་རབ་བྱུང་གཉིས་པའི་ཆུ་ཡོས (༡༡༢༣) ལོར་སྐུ་གཤེགས། རྣམ་ཐར་ལོ་རྒྱུས་རྒྱས་པ་ཡོངས་གྲགས་ནི་གཙང་སྨྱོན་ཧེ་རུ་ཀ་སངས་རྒྱས་རྒྱལ་མཚན་གྱིས་རབ་བྱུང་བརྒྱད་པའི་ཤིང་ཡོས (༡༤༩༥) ལོར་བརྩམས་པ་དང་། ཡང་རི་བོ་ཆེ་ཆོས་རྗེ་མི་གཡོ་མགོན་པོའི་སློབ་མ་རྟ་ཚག་པ་ཚེ་དབང་རྒྱལ་གྱིས་རབ་བྱུང་བརྒྱད་པའི་མེ་ཡོས (༡༤༤༧) ལོར་བརྩམས་པའིལྷོ་རོང་ཆོས་འབྱུང་ཐུབ་བསྟན་གསལ་བྱེད》ཀྱི་ནང་གོང་གི་རྣམ་ཐར་ནང་མི་གསལ་བའི་ལོ་རྒྱུས་མང་ཙམ་འདུག་པས་དེ་དག་ཏུ་གཟིགས་པར་ཞུ།
- language:
- Tibetan
3. gangs can mkhas grub rim byon ming mdzod
ཁོང་ནི་རབ་བྱུང་དང་པོའི་ལྕགས་ཕོ་འབྲུག་ལོ་སྟེ་སྤྱི་ལོ 1040 ལོར་གུང་ཐང་སྐྱ་རྔ་རྩར་ཡབ་མི་ལ་ཤེས་རབ་རྒྱལ་མཚན་དང་། ཡུམ་[660]མྱང་ཚ་དཀར་རྒྱན་གཉིས་ཀྱི་སྲས་སུ་སྐུ་འཁྲུངས། རུས་ཁྱུང་པོ་ཡིན། རབ་བྱུང་གཉིས་པའི་ཆུ་མོ་ཡོས་ལོ་སྟེ་སྤྱི་ལོ 1123 ལོར་སྐུ་གཤེགས། ཁོང་ཆུང་དུས་མཚན་ལ་ཐོས་པ་དགའ་ཞུ། སྐུ་ཆུང་ངུའི་དུས་ནས་ཡབ་འདས་པས་ཨ་ཁུ་དང་ཨ་ནེའི་གཡོག་ཕྲུག་གྱུར་ཏེ་སྡུག་བསྔལ་ཚད་མེད་མྱོང་། དེ་ནས་ཡུམ་ཆེན་གྱིས་མཐུ་གཏད་སེར་གསུམ་བསླབ་པར་ཡང་ཡང་བསྐུལ་བར་བརྟེན་གཉའ་གཡུང་སྟོན་ཁྲོ་རྒྱལ་མདུན་དུ་ཕེབས་ཏེ་མཐུ་ལ་སྦྱངས་ཀྱང་རྟགས་དེ་འདྲ་མ་ཐོན་པས་གནུབས་ཆུང་ཡོན་ཏན་རྒྱ་མཚོ་ལས་མཐུ་སྦྱངས་ནས་རྟགས་ཐོན་ཏེ་སྐྱ་མི་སོ་ལྔ་བསད། དེ་ནས་སླར་གཡུང་སྟོན་ཁྲོ་རྒྱལ་མདུན་དུ་བྱོན་ནས་སེར་བ་སྦྱངས་པས་རྟགས་ཐོན་ཏེ་ཡུལ་གྱི་ལོ་ཏོག་བཅོམ། དེ་རྗེས་སྡིག་པ་ལ་འགྱོད་པ་དང་། ངེས་འབྱུང་གི་བསམ་པ་སྐྱེས་ནས་གཙང་རོང་དུ་ཕེབས་ཏེ་རོང་སྟོན་ལྷ་དགའ་ལས་རྫོགས་པ་ཆེན་པོའི་གདམས་པ་མང་པོ་ཞུས། དགུང་ལོ་སོ་བརྒྱད་པར་ལྷོ་བྲག་ཆུ་ཁྱེར་དུ་ཕེབས་ནས་མར་པ་ཆོས་ཀྱི་བློ་གྲོས་དང་མཇལ། དེར་ལོ་ངོ་དྲུག་ལྷག་བཞུགས་ཏེ་སྡིག་བཤགས་སྲས་མཁར་དགུ་ཐོག་བཞེངས། དེ་ནས་བླ་མ་མར་པས་གསང་སྔགས་ཀྱི་དབང་ཆེན་བདེ་མཆོག་དྲུག་ཅུ་རྩ་གཉིས་ཀྱི་དཀྱིལ་འཁོར་དུ་དབང་བསྐུར་ནས་གསང་མཚན་ལ་དཔལ་བཞད་པ་རྡོ་རྗེ་ཞེས་བཏགས། རྒྱུད་ལུང་དང་། མན་ངག་ཉམས་ལེན་དང་ཕྱག་ལེན་རྒྱས་པར་གནང་། དེ་ནས་མི་ལས་མར་པ་ལ་བསྐུལ་ནས་འཕོ་བ་གྲོངས་འཇུག་གི་གདམས་ངག་ནཱ་རོ་པ་ལས་ཞུས་ནས་མི་ལ་གནང་། དགུང་ལོ་ཞེ་ལྔ་པ་ནས་བཟུང་བྲག་དཀར་རྟ་སོ་རྫོང་བཅས་རྫོང་ཆེན་དྲུག་སོགས་སུ་སྒྲུབ་པ་ནས་མཆོག་གི་[661]དངོས་ཐོབ། ཚེ་གཅིག་ལུས་གཅིག་ལ་སྐུ་བཞི་ཡེ་ཤེས་ལྔའི་བདག་ཉིད་ཁྱབ་བདག་རྡོ་རྗེ་འཆང་ཆེན་གྱི་གོ་འཕང་བརྙེས་སོ། ཁོང་གི་སློབ་མའི་ཚོགས་ནི་ཉི་མ་ལྟ་བུ་དྭགས་པོ་ལྷ་རྗེ། ཟླ་བ་ལྟ་བུ་རས་ཆུང་རྡོ་རྗེ་གྲགས་པ། རྒྱུ་སྐར་ལྟ་བུ་ངན་རྫོང་སྟོན་པ་བྱང་ཆུབ་རྒྱལ་པོ། རས་པ་ཞི་བ་འོད་སོགས་ཉེར་གསུམ། གྲུབ་ཐོབ་ཉེར་ལྔ། ཕྱིར་མི་ལྡོག་པའི་རྟོགས་ལྡན་བརྒྱ། དྲོད་ཐོབ་པའི་སྐྱེས་བུ་བརྒྱ་རྩ་བརྒྱད། ལམ་སྣ་ཟིན་པའི་རྣལ་འབྱོར་ཕོ་མོ་སྟོང་རྩ་གཅིག ངན་སོང་གི་རྒྱུན་ལམ་ཆད་པ་རྩིས་ལས་འདས་པ་བཅས་བྱུང་བ་ཡིན། ཁོང་གི་གསུང་རྩོམ་ནི་ཁྲག་འཐུང་རྒྱལ་པོས་བསྒྲིགས་པའི《རྗེ་བཙུན་མི་ལ་རས་པའི་རྣམ་ཐར་རྒྱས་པར་ཕྱེ་བ་མགུར་འབུམ》བཞུགས་སོ། །
- language:
- Tibetan