- thang dzam tshang
- ID:
- T232325
- ཐང་ཛམ་ཚང (Tibetan, Tibetan script, Original)
- > thang dzam tshang (Tibetan, Latin script, Transliteration-THL Extended Wylie Transliteration)
- > tang dzam tsang (Tibetan, Latin script, Transcription-THL Simplified Tibetan Transcription)
Other Dictionaries
1. dung dkar bod rig pa'i tshig mdzod chen mo
（唐三藏སྟེ་玄奘）ཐང་རྒྱལ་རབས་སྐབས་ཀྱི་སངས་ཆོས་ལུགས་ཀྱི་སློབ་དཔོན་མཚན་སྙན་ཆེ་བ་ཞིག་ཡིན།（སྤྱི་ལོ་༦༠༢ནས་༦༦༤）ཧན་རྒྱལ་རབས་ཀྱི་བློན་ཆེན་ཀྲུང་ཀུང་གི་གདུང་བརྒྱུད་ཡིན་ཀྱང་། ཆུང་དུས་ནས་རབ་བྱུང་གནང་སྟེ་ཐོག་མར་མངོན་པའི་སྡེ་སྣོད་ལ་མཁས་པར་སྦྱངས། བཀའ་འགྱུར་དང་བསྟན་འགྱུར་སོགས་དཔེ་དེབ་ལ་གཟིགས་རྒྱ་ཆེ། དགུང་ལོ་ཉི་ཤུ་རྩ་དགུར་ཕེབས་སྐབས་རྒྱ་གར་དུ་སློབ་གཉེར་ལ་ཕེབས་འདོད་ཆེན་པོ་བྱུང་སྟེ། ཐང་ཐའི་ཙུང་གི་དྲིན་ཀོན་ཁྲི་ལོ་དང་པོ་མེ་ཕག（༦༢༧）ལོར་གོང་ལ་སྙན་ཞུ་ཕུལ་ཡང་བློན་པོ་རྣམས་ཀྱི་བཀག ཚོང་པ་དང་ལེགས་འབུལ་མི་སྣའི་གྲས་ཀྱི་རྒྱ་གར་བའི་ཁོངས་སུ་ཞུགས་ནས་རྒྱ་གར་ཕལ་སྐད་དང་ངོ་ཆོས་ལོ་གསུམ་རིང་སྦྱངས་ཏེ་ནང་མི་ཞིག་གི་རོགས་རམ་འོག་རང་ཉིད་ཀྱི་རེ་འདུན་རྣམས་གོང་མའི་སྙན་དུ་འཁྱོལ་ནས། དྲིན་ཀོན་ཁྲི་ལོ་གསུམ་པ་ས་གླང(༦༢༩)ལོར་གནང་བ་ཐོབ། ལམ་ཡིག་བསྣམས་སྟེ་ལོ་དེར་རྒྱ་གར་དུ་ཐོན་ནས། ལམ་ཞོར་འགུ་ཚང་དང་། གྲུ་གུའི་ས་ཆ་བརྒྱུད་དེ་ཕེབས་པའི་ལམ་བརྒྱུད་ཀྱི་རྒྱལ་ཕྲན་ཚོས་ཀྱང་སྣེ་ལེན་ཞབས་ཏོག་ཕུན་སུམ་ཚོགས་པ་ཞུས་ཏེ་རྒྱ་གར་ཡུལ་དབུས་སུ་བྱོན། ལོ་བཅུ་བཞིའི་རིང་རྒྱ་གར་གྱི་ཡུལ་ཐམས་ཅད་དུ་གནས་མཇལ་དང་སློབ་གཉེར་ཟུང་འབྲེལ་གནང་། སློབ་དཔོན་དགེ་འདུན་གྲགས་པ་དང་། བི་ཤུད་དྷ་སིདྷ། ཛ་ཡ་བནྷ། སུ་རྱ་དེ་ཝ། ཛི་ན་རཀྵི་ཏ་སོགས་མཁས་པ་སུམ་ཅུ་ལྷག་ཙམ་བསྟེན་ནས། རིག་གནས་དང་། ཚད་མ། མངོན་པ། དབུ་མ། འདུལ་བ་སོགས་སྦྱངས་ཏེ་མཁས་པ་ཆེན་པོར་གྱུར། སྐབས་དེར་རྒྱ་གར་གྱི་དགོན་པའི་ནང་ནས་མཁས་པ་མང་ཤོས་བཞུགས་པའི་དགོན་པ་ཤྲི་ན་ལེནྡྲར་ཕེབས་ཤིང་། དགེ་འདུན་དང་སྐྱེ་བོ་ཕོ་མོ་སྟོང་ཕྲག་མང་པོས་བསུ་བ་ཞུས། ཕྱི་རྒྱལ་ནས་ཕེབས་པའི་སྐུ་མགྲོན་ཆོས་ལུགས་མཁས་ཤོས་ཀྱི་རིམ་པ་དང་མཐུན་པའི་སྣེ་ལེན་ཞུས་ཏེ་ལོ་གསུམ་གྱི་རིང་ཚད་དང་མངོན་པ་མཛོད་སོགས་ཆོས་མང་པོ་གསན་ཞིང་བཞུགས། དེ་ནས་རྒྱ་གར་ཤར་ཕྱོགས་དང་། ལྷོ་ཕྱོགས། ཁ་ཆེའི་ཡུལ་སོགས་སུ་བྱོན་ནས་གནས་མཇལ་དང་ཆབས་ཅིག་མཁས་པ་ཆེན་པོ་ཛེ་ཏཱ་རི་སོགས་བསྟེན་ནས་རིག་གནས་དང་ཆོས་མང་པོ་གསན་ཅིང་《གཅིག་ཏུ་གྲུབ་པ་》ཞེས་བྱ་བའི་བསྟན་བཅོས་སོགས་གཞུང་མང་པོ་བརྩམས་པས་རྒྱ་གར་གྱི་མཁས་པ་དང་། རྒྱལ་བློན། ཡུལ་མི་ཐམས་ཅད་ཀྱིས་དད་གུས་ཆེ་བའི་སློབ་དཔོན་ཆེན་པོར་གྱུར། སྤྱིར་རྒྱ་ནག་ནས་རྒྱ་གར་དུ་ཕེབས་པའི་ཧཱ་ཤང་མཁས་པ་ཆེན་པོ་ཧ་ཅང་མང་པོ་ཡོད་ཀྱང་སློབ་དཔོན་འདི་འདྲ་བའི་མཛད་རྗེས་ཆེ་བ་དང་སྙན་གྲགས་ཆེ་བ་བྱུང་མ་མྱོང་བ་ཡིན་ཞིང། རྒྱ་གར་དུ་སློབ་དཔོན་འདིའི་མཚན་ལ་མ་ཧཱ་ཡཱ་ན་དེ་བ་སྟེ་ཐེག་ཆེན་ལྷར་འབོད། དེ་ནས་རྒྱལ་པོ་ཚུལ་ཁྲིམས་ཉི་མ་སོགས་ལ་དགོངས་ཞུ་གནང་སྟེ་རྒྱ་ནག་ཏུ་ཕྱིར་ལོག་ཕེབས་ཁར། རྒྱལ་པོ་བཅོ་བརྒྱད་ཀྱིས་དགའ་སྐྱེལ་སྟོན་མོ་དང་དངོས་འབུལ་མང་པོ་ཕུལ་ཏེ་རྟེན་གསུམ་སྣ་ཚོགས་གླང་པོ་ཆེའི་ཁལ་གྱི་སུམ་ཆ་གཉིས། ན་བཟའ་ཆ་ཚང་། ཁལ་མ་གླང་པོ་ཆེ་གཅིག གསེར་ཊམ་ཁྲི། དངུལ་ཊམ་སུམ་ཁྲི། ཁ་ཆེའི་རས་ཡུག་བརྒྱ་ཐམ་པ་སོགས་ཕུལ། དེ་ནས་ལམ་ཞོར་རྒྱ་གར་ཤར་ཕྱོགས་ཀྱི་རྒྱལ་ཁབ་ཁག་ཏུ་ཕེབས་ཏེ་ཀོང་ཀྲེར་འབྱོར། སྐབས་དེར་ཁལ་མ་གླང་པོ་ཆེ་དེ་ཤི་བ་གོང་མ་ཐང་ཐའི་ཙུང་གིས་ཐོས་ནས་འུ་ལག་བཏང་ནས་སྐྱེལ་འདྲེན་བྱེད་དུ་བཅུག་པས་ཤིང་རྟ་འཁོར་ལོ་བཅུ་བཞིའི་ཁལ་བྱུང་། ཕུན་ཚུན་གྱི་ལམ་བར་ལོ་གསུམ་དང་རྒྱ་གར་ས་གནས་རང་དུ་ལོ་བཅུ་བཞི་བཞུགས་པ་བཅས་ལོ་བཅུ་བདུན་རིང་དཀའ་སྤྱད་འབད་བརྩོན་ཆེན་པོ་གནང་ཞིང་། དྲིན་ཀོན་ཁྲི་ལོ་བཅུ་དགུ་པ་ཤིང་སྦྲུལ(༦༤༥)ལོར་རྒྱལ་ས་ཁྲང་ཨན་དུ་བདེ་བར་ཕྱག་ཕེབས། གོང་མས་བློན་ཆེན་ཙི་ཕུ་ལིའང་སོགས་བློན་ཆེན་འགའ་ཤས་དང་། དགེ་འདུན་མང་པོར་བསུ་བ་བྱེད་དུ་བཅུག ཟླ་བ་གཉིས་པའི་ནང་གོང་མ་དང་མཇལ་ཞིང་། ཏཱ་ལའི་ལོ་མར་བྲིས་པའི་ཆོས་དཔེ་པོ་ཏི་དྲུག་བརྒྱ་ལྔ་བཅུ་ང་བདུན། སངས་རྒྱས་ཀྱི་རིང་བསྲེལ་རྡོག་བརྒྱ་དང་ལྔ་བཅུ། ཙནྡན་ལས་བཞེངས་པའི་སངས་རྒྱས་ཀྱི་སྐུ་བརྙན་ཆེ་ཆུང་གསུམ། གསེར་ཟངས་ལས་བཞེངས་པའི་སངས་རྒྱས་ཀྱི་སྐུ་བརྙན་ཆེ་བ་གཉིས། ཁ་ཆེའི་རས་དང་། གསེར་དངུལ་གྱི་དོང་ཙེ་སོགས་དངོས་སྐྱེལ་མང་པོ་ཕུལ། གོང་མས་དེ་རྣམས་ལ་བདག་གཉེར་ཡག་པོ་བྱས་ཏེ་ཁྲང་ཨན་ཧུང་ཧྥུ་སི(长安弘福寺)བཞུགས་གནས་སུ་གནང་། དགོན་པ་དེའི་ཧཱ་ཤང་ལི་བཞུན་སོགས་དགེ་བཤེས་མཁས་པ་བཅུ་གཉིས་རོགས་རམ་དང་། བློན་པོ་ལིའང་ཀོ་ཀུང་དོ་དམ་པར་བསྐོས་ནས་《རྒྱས་འབྲིང་བསྡུས་གསུམ་》དང་《བྱམས་ཆོས་སྡེ་ལྔ་》སོགས་བཀའ་བསྟན་པོ་ཏི་བདུན་ཅུ་དོན་ལྔ（ལེ་ཚན་ཆིག་སྟོང་སུམ་བརྒྱ་སུམ་ཅུ་སོ་ལྔ་）རྒྱ་སྐད་དུ་བསྒྱུར་ཞིང་། འགྱུར་རྙིང་འགའ་ཞིག་ལ་འགྱུར་བཅོས་ཀྱང་གནང་། ཚེ་ཨིན་ཟི་སྟེ་（慈恩寺）བྱམས་པ་གླིང་ཟེར་བའི་དགོན་རྙིང་ལ་ཞིག་གསོས་རྒྱ་སྐྱེད་གནང་ཏེ། གོང་མའི་སྐུ་ཉེ་ཝང་ལིའུ་ཏའོ་ཙུང་ཆེད་དུ་མངགས་ནས་སློབ་དཔོན་འདི་ཉིད་དགོན་པར་དེར་གདན་དྲངས། ཧུང་ཧྥུ་ཟི（弘福寺）ནས་བཙུན་གསར་ལྔ་བཅུ་དང་། དེ་བྱིངས་དགོན་ཁག་སུམ་སྟོང་བདུན་བརྒྱ་ནས་བཙུན་གསར་ལྔ་རེ་བསྡུས་པས་རབ་བྱུང་ཕོ་མོ་ཆིག་ཁྲི་བརྒྱད་སྟོང་དྲུག་བརྒྱ་སུམ་ཅུ་ཡོད་པ་ཞིག་བྱུང་། སློབ་དཔོན་དང་རབ་བྱུང་ཐམས་ཅད་ཀྱི་འཚོ་བ་རྒྱལ་པོའི་མཛོད་ནས་སྦྱར། དགོན་པ་ཆེ་བ་གསུམ་སློབ་དཔོན་ལ་ཕུལ་ཏེ་རེ་ཞིག་བར་སློབ་དཔོན་གྱིས་མཁན་པོ་གནང་། 《འབུམ་འགྲེལ་སེམས་ལུགས་མ》《རྒྱ་ཆེན་སྤྱོད་པའི་དོན་བསྡུས་སྐབས་བརྒྱད་མ》《ལང་ཀར་གཤེགས་པའི་མདོའི་འགྲེལ་པ》《མདོ་སྡེ་དགོངས་པ་ངེས་འགྲེལ་གྱི་འགྲེལ་པ》《མངོན་པ་མཛོད་ཀྱི་འགྲེལ་པ》《ཚད་མ་བསྡུས་པ》ལ་སོགས་པའི་བསྟན་བཅོས་མང་པོ་མཛད་ཅིང་། འགའ་ཞིག་བོད་སྐད་དུ་བསྒྱུར་བ་དེང་སང་ཡང་བསྟན་འགྱུར་ནང་དུ་བཞུགས། ལོ་བཞི་བཅུའི་རིང་ཆོས་ལུགས་དར་སྤེལ་གནང་ནས། དགུང་ལོ་དྲུག་ཅུ་རེ་ལྔ་པ（ཐང་ཀའོ་ཙུང་གི་ལོང་ཧྲུའོ་ཁྲི་ལོ་གསུམ་པ）ཆུ་ཕག(༦༩༣)ལོར་སྐུ་གཤེགས། སློབ་དཔོན་འདིའི་རྣམ་ཐར་རྒྱས་པ《ཐང་སན་ཛང་གི་ལམ་ཡིག་》ཟེར་བ་ཞིག་ཡོད་ཚོད་འདུག་ཀྱང་བདག་གིས་ད་ཕན་མཐོང་མ་མྱོང་ཞིང་། འདིར་བཀོད་པ་ནི། སོག་པོ་ལོ་ཙཱ་བ་གུང་མགོན་པོ་སྐྱབས་ཀྱིས་བརྩམས་པའི་《རྒྱ་ནག་ཆོས་འབྱུང་》ལས་གནད་བསྡུས་བྱས་པ་ཡིན།
- language:
- Tibetan
2. Thupten Phuntsok Dictionary
ཐང་རྒྱལ་རབས་སྐབས་ཀྱི་སངས་རྒྱས་ཆོས་ལུགས་ཀྱི་སློབ་དཔོན་མཚན་སྙན་ཆེ་བ་ཞིག་ཡིན། སྤྱི་ལོ༦༠༢ནས༦༦༤ཧན་རྒྱལ་རབས་ཀྱི་བློན་ཆེན་ཀྲུང་ཀུང་གི་གདུང་བརྒྱུད་ཡིན་ཀྱང་། ཆུང་དུས་ནས་རབ་བྱུང་གནང་སྟེ་ཐོག་མར་མངོན་པའི་སྡེ་སྣོད་ལ་མཁས་པར་སྦྱངས། བཀའ་འགྱུར་དང་བསྟན་འགྱུར་སོགས་དཔེ་དེབ་ལ་གཟིགས་རྒྱ་ཆེ། དགུང་ལོ་ཉི་ཤུ་རྩ་དགུར་ཕེབས་སྐབས་རྒྱ་གར་དུ་སློབ་གཉེར་ལ་ཕེབས། ལོ་གསུམ་གྱི་རིང་ཚད་མ་དང་མངོན་མཛོད་སོགས་ཆོས་མང་པོ་གསན་ཞིང་བཞུགས། རྒྱ་གར་དུ་སློབ་དཔོན་འདིའི་མཚན་ལ་མ་ཧཱ་ཡཱ་ན་དེ་བ་སྟེ་ཐེག་ཆེན་ལྷར་འབོད། དགུང་ལོ་དྲུག་ཅུ་རེ་ལྔ་པ (ཐང་ཀའོ་ཙུང་གི་ལོང་ཧྲུའོ་ཁྲི་ལོ་གསུམ་པ) ཆུ་ཕག (༦༩༣) ལོར་སྐུ་གཤེགས།
- language:
- Tibetan