- spyan snga grags pa 'byung gnas
- ID:
- T236299
- སྤྱན་སྔ་གྲགས་པ་འབྱུང་གནས (Tibetan, Tibetan script, Original)
- > spyan snga grags pa 'byung gnas (Tibetan, Latin script, Transliteration-THL Extended Wylie Transliteration)
- > chen nga drakpa jungné (Tibetan, Latin script, Transcription-THL Simplified Tibetan Transcription)
Other Dictionaries
1. dung dkar bod rig pa'i tshig mdzod chen mo
ཡབ་རླངས་ཀྱི་གདུང་རྒྱུད་ཡོན་ཆེན་རྒྱལ་བ་སྐྱབས་དང་ཡུམ་འབྲོ་ལྡོག་བཟའ་ཁུ་བྱུག་སྨན་གཉིས་ཀྱི་སྲས་སུ་རབ་བྱུང་གསུམ་པའི་ཤིང་ལུག་（༡༡༧༥）ལོར་སྐུ་འཁྲུངས། རྗེ་འདི་སྐུ་གཞོན་ནུའི་དུས་འབྲི་གུང་སྐྱོབ་པ་འཇིག་རྟེན་མགོན་པོའི་ཞབས་ལ་གཏུགས་ཏེ་དགུང་ལོ་བཅོ་བརྒྱད་ནས་སོ་བཞི་བར་བླ་མ་དང་འབྲལ་མེད་དུ་གཟིམ་གཡོག་ཞུས་པས་སྤྱན་སྔ་པ་ཞེས་པའི་མཚན་ཡང་དེ་ནས་ཐོགས། ཕྱིས་རླངས་ཀྱི་གདུང་རྒྱུད་ཀྱིས་ཐེལ་གྱི་གདན་ས་འཛིན་པ་རྣམས་དང་། འབྲི་གུང་པའི་བླ་མའི་མཚན་གནས་ལྟ་བུར་གྱུར་ནས་སྤྱན་སྔ་ཞེས་བྱ་བའི་འབོད་སྲོལ་བྱུང་། བཀའ་རྒྱུད་བསྟན་པའི་ཆུ་འགོ་དཔའ་ཕག་མོ་གྲུ་པའི་ཐེལ་གྱི་གདན་ས་ཉག་ཕྲ་བར་གྱར་སྐབས་འབྲི་གུང་སྐྱོབ་པས་སྤྱན་སྔ་གྲགས་པ་འབྱུང་གནས་ལ་གཟེངས་བསྟོད་དང་བཅས་རབ་བྱུང་བཞི་པའི་ས་འབྲུག་（༡༢༠༨）ལོར་ཕག་མོ་གྲུ་པའི་ཐེལ་གྱི་གདན་སར་བསྐོ་གཞག་གནང་བས་འཁོར་ལོ་གསུམ་གྱི་མཛད་པས་ཡར་རྒྱས་འགྲན་ཟླ་དང་བྲལ་བ་བྱུང་། དེ་ནས་འབྲི་གུང་དུ་དབོན་རིན་པོ་ཆེ་ཞི་བར་གཤེགས་པའི་གདུང་འབུལ་དུ་ཕེབས་དུས་གཅུང་རིན་པོ་ཆེ་དང་། འབྲི་གུང་གླིང་པ་སོགས་ཀྱིས་ཞུ་ནན་མཛད་པ་ལྟར་འབྲི་གུང་གི་གདན་ས་ཡང་འཛིན་སྐྱོང་གཅིག་ལྕོགས་གནང་། དེར་བཞུགས་པའི་ལོ་བདུན་པ་ལྕགས་བྱི་（༡༢༤༠）ལོར་ཧོར་དམག་བོད་དུ་ལྷགས་ནས་རྭ་སྒྲེང་དང་རྒྱལ་ལྷ་ཁང་མེར་བསྲེགས་པ་དང་སོ་སྟོན་སོགས་སྐྱ་སེར་ལྔ་བརྒྱ་བསད། དེ་སྐབས་ཧོར་དམག་འདམ་དུ་སླེབས་པའི་འུར་བྱུང་བས་འབྲི་གུང་ཁུང་ཐེལ་གྱི་དགེ་འདུན་རྣམས་ཀྱང་འབྲོས་པར་བརྩམས་པའི་ཚེ་མི་འཇིགས་པའི་གསུང་གིས་དབུགས་ཕྱུང་ནས་གཞུགས། དེ་ཡང་ཐོག་མར་ཧོར་གྱི་དམག་དཔོན་མི་ལི་བྱི་བྱུང་བ། སྐུ་མཐོང་བ་ཙམ་གྱིས་དད་པ་སྐྱེས་ནས་ཕ་དང་བུའི་འདུ་ཤེས་བྱུང་ནས་ཕྱིས་འབུལ་བ་སྐྱེལ་བར་ཁས་བླངས་ཏེ། མི་ཕྱུགས་གང་ལ་ཡང་གནོད་པ་མེད་པར་ཕྱིར་ལོག། དེ་ནས་ཞག་ཉི་ཤུ་རྩ་བརྒྱད་ན་དོར་རྟས་དམག་དཔོན་བྱས་ནས་དམག་སླེབས་བྱུང་བ་ཡང་འདི་ཉིད་ཀྱིས་ཐབས་མཁས་ལ་བརྟེན་པས་ཞི་བ་ཆེན་པོར་གྱུར་ཏེ་དམག་རྣམས་ཚོང་པ་འགྲིམ་པ་པས་ཀྱང་འཇམ་ཞིང་ཁུ་ཅོ་མེད་པར་ལོག་དེ་ཕྱིན་ཆད་སྟབས་ཉེས་རེ་ཙམ་མ་གཏོགས་མི་བསད་པ་དང་ལྷ་ཁང་བསྲེགས་པ་སོགས་ཆེར་མ་བྱུང་། བོད་ཁམས་སྤྱི་ལ་བཀའ་དྲིན་གྱིས་ཁྱབ་པར་མཛད། དེ་བཞིན་འབྲི་ཁུང་གི་སྡེ་ཡང་ཆེར་འཕེལ་ནས་ཁྲི་ཚོ་བཅོ་བརྒྱད་དུ་གྲགས་པ་ཡང་དུས་དེར་བྱུང་། རིན་པོ་ཆེ་ལས་བསྒྲུབས་པའི་སྒོ་མངས་གཉིས་ཀྱང་བཞེངས། རྒྱ་གར་དང་བོད་ཀྱི་ལྷ་གདོང་པ་ལ་སོགས་པའི་དམ་པ་ཐམས་ཅད་ཀྱང་ཆོས་ཀྱིས་ཚིམ་པར་མཛད། མཐར་དགུང་ལོ་གྱ་གཅིག་པ་རབ་བྱུང་བཞི་པའི་ཤིང་ཡོས་（༡༢༥༥）ལོར་ཧོར་ཟླ་བཅུ་གཅིག་པའི་ཚེས་བཅོ་བརྒྱད་ལ་སྐུ་གཤེགས། གདུང་བཞུ་བས་རིང་བསྲེལ་དཔག་ཏུ་མེད་པའང་བྱོན། བུ་སློབ་རྣམས་ཀྱིས་ཀྱང་དགོངས་པ་རྫོགས་པའི་ཕྱིར་སྒོ་མངས་ཁྱད་པར་ཅན་ཞིག་ཀྱང་བཞེངས། ཕྱིན་ཆད་ཀྱང་ཤིན་ཏུ་བཀྲ་ཤིས་པར་གྱུར་ཏོ། བུ་སློབ་ཀྱང་རྒྱལ་བ་རིན་པོ་ཆེ། གཅུང་རིན་པོ་ཆེ། རྒྱལ་བ་ཡང་དགོན་པ། རྒྱལ་སྲས་ཐོག་ཁ་བ། རིན་པོ་ཆེ་གྲགས་བསོད། རིན་པོ་ཆེ་གཏེར་རྒྱབ་པ། སྤྱན་སྔ་སྒོ་མངས་པ། སྙེ་མདོ་ཐམས་ཅད་མཁྱེན་པ་ལ་སོགས་པ་མང་དུ་བྱོན་ནོ། ལོ་རྒྱུས་རྒྱས་པ་（ལྷོ་རོང་ཆོས་འབྱུང་）ཤོག་གྲངས་༢༩༠པའི་ནང་ཤོག་གྲངས་འགའ་ཞིག་དང་《དེབ་ཐེར་སྔོན་པོ་》ལེ་ཚན་（ཉ）པའི་ཤོག་གྲངས་༧༤ནས་༧༧བར་གསལ།།
- language:
- Tibetan
2. Thupten Phuntsok Dictionary
ཡབ་རླངས་ཀྱི་གདུང་རྒྱུད་ཡོན་ཆེན་རྒྱལ་བ་སྐྱབས་དང་ཡུམ་འབྲོ་ལྡོག་བཟའ་ཁུ་བྱུག་སྨན་གཉིས་ཀྱི་སྲས་སུ་རབ་བྱུང་གསུམ་པའི་ཤིང་ལུག (༡༡༧༥) ལོར་སྐུ་འཁྲུངས། རྗེ་འདི་སྐུ་གཞོན་ནུའི་དུས་འབྲི་གུང་སྐྱོབ་པ་འཇིག་རྟེན་མགོན་པོའི་ཞབས་ལ་གཏུགས་ཏེ་དགུང་ལོ་བཅོ་བརྒྱད་ནས་སོ་བཞི་བར་བླ་མ་དང་འབྲལ་མེད་དུ་གཟིམ་གཡོག་ཞུས་པས་སྤྱན་སྔ་བ་ཞེས་པའི་མཚན་ཡང་དེ་ནས་ཐོགས། ཕྱིས་རླངས་ཀྱི་གདུང་རྒྱུད་ཀྱིས་ཐེལ་གྱི་གདན་ས་འཛིན་པ་རྣམས་དང་། འབྲི་གུང་པའི་བླ་མའི་མཚན་གནས་ལྟ་བུར་གྱུར་ནས་སྤྱན་སྔ་ཞེས་བྱ་བའི་འབོད་སྲོལ་བྱུང་། རབ་བྱུང་བཞི་པའི་ས་འབྲུག (༡༢༠༨) ལོར་ཕག་མོ་གྲུ་པའི་ཐེལ་གྱི་གདན་སར་བསྐོ་གཞག་གནང་བས་འཁོར་ལོ་གསུམ་གྱི་མཛད་པས་ཡར་རྒྱས་འགྲན་ཟླ་དང་བྲལ་བ་བྱུང་། མཐར་དགུང་ལོ་གྱ་གཅིག་པ་རབ་བྱུང་བཞི་པའི་ཤིང་ཡོས་ (༡༢༥༥) ལོའི་ཧོར་ཟླ་བཅུ་གཅིག་པའི་ཚེས་བཅོ་བརྒྱད་ལ་སྐུ་གཤེགས། གདུང་བཞུག་བས་རིང་བསྲེལ་དཔག་ཏུ་མེད་པའང་བྱོན། བུ་སློབ་རྣམས་ཀྱིས་ཀྱང་དགོངས་པ་རྫོགས་པའི་ཕྱིར་སྒོ་མངས་ཁྱད་པར་ཅན་ཞིག་ཀྱང་བཞེངས།
- language:
- Tibetan
3. gangs can mkhas grub rim byon ming mdzod
ཁོང་ནི་རབ་བྱུང་གསུམ་པའི་ཤིང་མོ་ལུག་ལོ་སྟེ་སྦྱི་ལོ 1175 [1027]ལོར་ཡབ་ཡོན་ཆེན་རྒྱལ་བ་སྐྱབས་དང་། ཡུམ་འབྲོ་ལྡོག་བཟའ་གྱུ་གུ་ལྕམ་གཉིས་ཀྱི་སྲས་སུ་སྐུ་འཁྲུངས། གདུང་རུས་རླངས་ཡིན། རབ་བྱུང་བཞི་པའི་ཤིང་མོ་ཡོས་ལོ་སྟེ་སྤྱི་ལོ་1255 ལོར་སྐུ་གཤེགས། དགུང་ལོ་བཅུ་གསུམ་པར་མཁན་པོ་རྫོང་མགོ་བ་དང་། སློབ་དཔོན་སྟོན་པ་གཉིས་ལས་རབ་ཏུ་བྱུང་ཞིང་མཚན་ལ་གྲགས་པ་འབྱུང་གནས་ཞེས་གསོལ། དེ་ནས་བླ་མ་ཡེ་ཕུག་པ་ལ་བསྟེན་ཏེ་ཐུན་འཇོག་དང་ལྷན་ཅིག་སྐྱེས་སྦྱོར་སོགས་ཀྱི་ཁྲིད་འགའ་གསན། དགུང་ལོ་བཅོ་ལྔ་པར་འབྲི་གུང་དུ་བྱོན། ཆོས་རྗེ་སྐྱོབ་པ་དང་མཇལ་ནས་ཆོས་མང་དུ་ཞུས་ཏེ་སྒོམ་པས་རྣམ་པར་སྤྲོས་པའི་ཏིང་ངེ་འཛིན་གྱི་རྒྱལ་པོ་ཐུགས་ལ་འཁྲུངས། དགུང་ལོ་བཅུ་བདུན་པར་ཆོས་རྗེ་སྐྱོབ་པ་དང་ལྷན་དུ་དྭགས་བོར་ཕེབས། དགུང་བཅོ་བརྒྱད་པར་ཞང་སུམ་ཐོག་པས་མཁན་པོ་དང་། ལྷ་འབྲི་སྒངས་པས་ལས་སློབ། མཁན་པོ་རིན་པོ་ཆེས་གསང་སྟོན་མཛད་ནས་བསྙེན་པར་རྫོགས། དེ་ནས་འབྲི་གུང་དུ་ཕེབས་ནས་ཆོས་རྗེ་སྐྱོབ་པའི་གཟིམས་གཡོག་མཛད་པས་སྤྱན་སྔ་བར་གྲགས། དགུང་ལོ་བཅོ་བརྒྱད་ནས་སུམ་ཅུ་སོ་བཞི་བར་དུ་ཆོས་རྗེ་སྐྱོབ་པ་ལས་གསན་སྦྱངས་མཛད། དེ་ནས་ཆོས་རྗེ་སྐྱོབ་པས་ཁྲི་མཐོན་པོའི་སྟེང་དུ་བཞུགས་སུ་བཅུག་སྟེ་དེ་སྔ་ཁྱེད་ངའི་བུ་ཡིན། སློབ་མ་ཡིན། དེ་རིང་ནས་བཟུང་ཁྱེད་ངའི་བླ་མ་ཡིན། ཕ་ཡིན་ཞེས་གསུངས་ནས་ཕྱག་ལེགས་པར་མཛད་ཅིང་ཕག་གྲུའི་གདན་སར་ཕེབས་སུ་བཅུག དེ་ནས་དགོན་པའི་འདུལ་ཁྲིམས་ལེགས་པར་སྐྱོང་ཞིང་འཆད་ཉན་གྱི་བྱ་བ་ལེགས་པར་སྤེལ། བསམ་ཡས་བཙད་པོའི་ལྟོ་འོག་ཏུ་མ་ཚུད་པའི་[1028]དབང་གིས་རྗེ་ཐམས་ཅད་མཁྱེན་པ་ཞེས་གྲགས། གདན་ས་ལོ་ངོ་ཉི་ཤུ་རྩ་དྲུག་རིང་དུ་བསྐྱངས། སྡེ་དགོན་ཐམས་ཅད་ཤིན་ཏུ་དར་བར་གྱུར། དེ་ནས་འབྲི་གུང་དུ་ཕེབས་ཏེ་གདན་ས་རིན་པོ་ཆེར་ལོ་ངོ་ཉེར་གཉིས་བཞུགས། དེ་ནས་དོར་རྟ་ནག་པོ་སོགས་ལ་གྲུབ་རྟགས་བསྟན་པས་མི་བསད་པ་དང་། ལྷ་ཁང་བསྲེགས་པ་སོགས་གནོད་སྐྱོན་ཆེར་མ་བྱུང་། འབྲི་གུང་གི་སྡེ་ཡང་ཇེ་མང་དུ་འཕེལ་ནས་ཁྲི་ཚོ་བཅོ་བརྒྱད་དུ་གྲགས་པའང་དེའི་དུས་བྱུང་། རིན་པོ་ཆེ་ལས་བསྒྲུབས་པའི་བཀྲ་ཤིས་སྒོ་མང་གཉིས་ཀྱང་བཞེངས་མཛད། བོད་ཁམས་སྤྱི་ལ་བཀའ་དྲིན་གྱིས་ཁྱབ་པར་མཛད། དགུང་ལོ་གྱ་གཅིག་པར་དགོངས་ཆོས་དབྱིངས་སུ་འཐིམས། ཁོང་ནི་ཕག་གྲུའི་གདན་རབས་གསུམ་པ་ཡིན། ཁོང་གི་སློབ་མ་གྲགས་ཆེ་བ་ནི་རྒྱལ་བ་རིན་པོ་ཆེ་དང་། བཅུ་གཉིས་པ། གཅུང་རིན་པོ་ཆེ། རྒྱལ་བ་ཡང་དགོན་པ། རྒྱལ་སྲས་ཐོག་ཁ་བ། རིན་པོ་ཆེ་གྲགས་བསོད། རིན་པོ་ཆེ་གཏེར་རྒྱབ་བ། སྤྱན་སྔ་སྒོ་མང་བ། སྙེ་མདོ་ཐམས་ཅད་མཁྱེན་པ་བཅས་ཡིན་ནོ། །
- language:
- Tibetan