- rma sgom chos kyi shes rab
- ID:
- T239935
- རྨ་སྒོམ་ཆོས་ཀྱི་ཤེས་རབ (Tibetan, Tibetan script, Original)
- > rma sgom chos kyi shes rab (Tibetan, Latin script, Transliteration-THL Extended Wylie Transliteration)
- > ma gom chö kyi sherab (Tibetan, Latin script, Transcription-THL Simplified Tibetan Transcription)
Other Dictionaries
1. Thupten Phuntsok Dictionary
འདི་ཉིད་རྨ་སྨོན་ལམ་གྱི་སྲས་སུ་རབ་བྱུང་དང་པོའི་ཤིང་ལུག (༡༠༥༥) ལོར་ཡར་སྟོད་སྐྱེར་སྣར་སྐུ་འཁྲུངས། སྐུ་གཞོན་ནུའི་དུས་རབ་ཏུ་བྱུང་སྟེ་མཚན་ཆོས་ཀྱི་ཤེས་རབ་ཏུ་བཏགས། ཡབ་ལས་པདྨ་དབང་ཆེན་གསན། དེ་ནས་སྤྱོད་ཕྱོགས་དང་དབུ་མ་དང་དོ་ཧ་སྟོད་ལུགས་དང་གྲུབ་སྙིང་རྣམས་གསན། དགུང་ལོ་བཅུ་དགུར་ཕེབས་སྐབས་དམ་པ་དང་མཇལ་ཏེ་གདམས་པ་ཞིག་གནང་འཚལ་ཞུས་པས། དོན་གྱི་ཕྱག་རྒྱ་ཆེན་པོ་བསྟན་གྱི་གསུངས་ནས་མིག་ནི་མི་འཛུམ་སེམས་ནི་འགགས་པ་དང་། །རླུང་འགགས་པ་ནི་དཔལ་ལྡན་བླ་མས་རྟོགས། །ཞེས་བྱ་བ་ལ་སོགས་པའི་གཞུང་ལ་བརྟེན་ནས་རྩ་བའི་ངོ་སྤྲོད་མཛད་པས་ཉམས་རྟོགས་ཁྱད་པར་ཅན་འཁྲུངས། དེ་རྗེས་བཀོད་པ་དྲུག་ཅུ་རྩ་བཞི་པའི་རྡེའུ་ཁྲིད་གནང་ནས་དམ་པའི་སར་ཟླ་བ་གསུམ་བཞུགས། དེ་ནས་ཡུལ་དུ་བྱོན་ཏེ་འཁོར་འདབ་དང་ནོར་རྫས་སྤངས་ཏེ་སྒྲུབ་པ་པོར་མཛད་ནས་རྨའི་ཕུག་པར་ལོག་གཅིག་བཞུགས་པ་དང་། ཀོང་པོ་བྲག་གསུམ་གྱི་མཚོ་རྫོང་ལ་བྱོན་ནས་ལོ་དགུ་བཞུགས། ད་ནི་སེམས་ཅན་གྱི་དོན་འོང་ངམ་དགོངས་ནས་དྭགས་པོ་རྫོང་ཁར་འཁོར་མང་དུ་བསྟེན། དེ་ནས་ཡར་ལུང་དུ་བྱོན་ནས་ཀྱི་ཚང་དུ་ལོ་གསུམ་བཞུགས། བུ་སློབ་མང་དུ་འཚོགས་ཤིང་ཆོས་ཞུ་གར་བྱུང་དུ་བཞུགས་སོ། ། ཁོང་ལ་བུ་ཆེན་ལྔ་བྱོན་ཏེ། གང་བར་གཤེན། ཤུད་བ་ལོ་ཙཱ་བ། བླ་མ་ཤེའུ། སོག་པོ་མདོ་སྡེ། ཞང་དགའ་ལྡན་པ་བཅས་སོ། །
- language:
- Tibetan
2. gangs can mkhas grub rim byon ming mdzod
ཁོང་ནི་རབ་བྱུང་དང་པོའི་ཤིང་མོ་ལུག་ལོ་སྟེ་སྤྱི་ལོ 1055 ལོར་ཡར་སྟོད་སྐྱེར་སྣང་དུ་རྨ་སྨོན་ལམ་གྱི་སྲས་སུ་སྐུ་འཁྲུངས། འདས་ལོ་མི་གསལ། ཁོང་གཞོན་ནུའི་དུས་ནས་རབ་ཏུ་བྱུང་ཞིང་མཚན་ལ་ཆོས་ཀྱི་ཤེས་རབ་ཅེས་གསོལ། ཡབ་ཆེན་ལས་པདྨ་དབང་ཆེན་དང་། སྤྱོད་ཕྱོགས། དབུ་མ། དོ་ཧ་སྟོད་ལུགས། གྲུབ་རྙིང་རྣམས་གསན། དགུང་ལོ་བཅུ་དགུ་པར་ཕ་དམ་པ་སངས་རྒྱས་དང་མཇལ་ནས་ཕ་རྒྱུད་དང་ཕྱག་རྒྱ་ཆེན་པོ་རྣམས་ཞུས་པས་ཉམས་རྟོགས་ཁྱད་པར་ཅན་སྐྱེས། དེ་ནས་སྒོམ་སྒྲུབ་ཉམས་ལེན་མཛད་པས་ངེས་ཤེས་ཁྱད་པར་ཅན་སྐྱེས་ཏེ་དགུན་ཁར་འཕན་ཡུལ་དུ་བྱོན་ནས་ཕ་དམ་པ་སངས་རྒྱས་ལས་བཀོད་པ་དྲུག་ཅུ་རྩ་བཞི་པའི་རྡེའུ་ཁྲིད་ཞུས། དེ་ནས་ཕ་ཡུལ་དུ་བྱོན་ཏེ་འཁོར་འདབ་དང་ནོར་རྫས་སྤངས་ཏེ་སྒྲུབ་པར་མཛད་ནས་རྨའི་ཕུག་པར་ལོ་གཅིག་བཞུགས། དེ་ནས་ཀོང་པོ་བྲག་གསུམ་གྱི་མཚོ་རྫོང་ལ་བྱོན་ཏེ་ལོ་དགུར་བཞུགས། ཡུལ་དེའི་འཁྲུགས་པ་རྣམས་བསྡུམས་པར་མཛད། དེ་ནས་དྭགས་རྫོང་ཁ་དང་། ཡར་ཀླུང་དུ་བྱོན་ཏེ་ལོ་གསུམ་བཞུགས་ཤིང་བུ་སློབ་མང་དུ་བསྐྱངས། ཞི་བྱེད་བརྒྱུད་པ་བར་མ་རྨ་ལུགས་ཞེས་པ་དེ་ཁོང་གིས་སྲོལ་གཏོད་ནས་བརྒྱུད་པ་ཟམ་མ་ཆད་པར་ཡང་ནས་ཡང་དུ་དར་རོ། ཁོང་གི་སློབ་མ་གྲགས་ཆེ་བ་ནི་གང་བར་གཤེན་དང་། ཤུད་པུ་ལོ་ཙཱ་བ། བླ་མ་ཤེའུ། སོག་པོ་མདོ་སྡེ། ཞང་དགའ་ལྡན་པ་རྣམས་ཡིན། །
- language:
- Tibetan