- zhing skyong grags pa bkra shis
- ID:
- T241800
- ཞིང་སྐྱོང་གྲགས་པ་བཀྲ་ཤིས (Tibetan, Tibetan script, Original)
- > zhing skyong grags pa bkra shis (Tibetan, Latin script, Transliteration-THL Extended Wylie Transliteration)
- > shyingkyong drakpa tashi (Tibetan, Latin script, Transcription-THL Simplified Tibetan Transcription)
Other Dictionaries
1. Thupten Phuntsok Dictionary
མདོ་སྨད་བྱ་ཁྱུང་དགོན་གྱི་མཁན་རབས་ཉེར་གསུམ་པ་འདི་ཉིད་རབ་བྱུང་བཅུ་གཅིག་པའི་ལྕགས་ལུག (༡༦༣༡) ལོར་སྐུ་འབུམ་མཆོད་གཞིས་ཞིང་སྐྱོང་ཀྲ་གྱ་སྡེ་ཞེས་བྱ་བར་སྐུ་འཁྲུངས། རྗེ་ལྷུན་གྲུབ་རྒྱ་མཚོ་ལས་རབ་ཏུ་བྱུང་། རྒྱལ་དབང་ལྔ་པ་ཆེན་པོ་ལས་དབང་རྡོ་རྗེ་ཕྲེང་སོགས་མང་དུ་ཞུས། དེ་ནས་སླར་སྐུ་འབུམ་དུ་ཕེབས་ནས་རྒྱུད་གྲྭར་ཞུགས་ཤིང་རྒྱུད་པའི་མཁན་པོ་མཛད། མཐར་དགུང་ལོ་དྲུག་ཅུ་ལ་ཕེབས་པ་རབ་བྱུང་བཅུ་གཉིས་པའི་ལྕགས་རྟ (༡༦༩༠) ལོར་ཡ་མཚན་གྱི་ལྟས་དང་བཅས་མྱ་ངན་ལས་འདས་སོ། །
- language:
- Tibetan
2. gangs can mkhas grub rim byon ming mdzod
ཁོང་ནི་རབ་བྱུང་བཅུ་གཅིག་པའི་ལྕགས་མོ་ལུག་ལོ་སྟེ་སྤྱི་ལོ 1631 ལོར་སྐུ་འབུམ་མཆོད་གཞིས་ཀྲང་ཀྱཱ་སྡེ་བར་སྐུ་འཁྲུངས། རབ་བྱུང་བཅུ་གཉིས་པའི་ལྕགས་ཕོ་རྟ་ལོ་སྟེ་སྤྱི་ལོ 1690 ལོར་སྐུ་གཤེགས། ཁོང་རྗེ་ལྷུན་གྲུབ་རྒྱ་མཚོ་ལས་རབ་ཏུ་བྱུང་། བཙན་པོ་དོན་གྲུབ་རྒྱ་མཚོ་སློབ་དཔོན་དུ་བསྟེན་ནས་སྐུ་འབུམ་དཔལ་ལྡན་བཤད་སྒྲུབ་གླིང་[1478]གི་ཆོས་སྒོར་ཞུགས། རྣམ་འགྲེལ་དང་། ཕར་ཕྱིན་གཞུང་ལ་སྦྱངས་པ་མཐར་ཕྱིན་པ་མཛད་དེ། དགོན་ལུང་དང་། བྱ་ཁྱུང་སོགས་ཀྱི་བཤད་གྲྭ་དུ་མར་དམ་བཅའ་བཞག དེ་ནས་དབུས་སུ་ཕེབས་ཏེ་འབྲས་སྤུངས་སྒོ་མང་གྲྭ་ཚང་གི་ཆོས་སྒོར་ཞུགས་ནས་གཞུང་བཀའ་པོད་ལྔ་ལ་ཐོས་བསམ་མཛད། དཔལ་ལྡན་སྨད་རྒྱུད་གྲྭ་ཚང་དུ་ཞུགས་ཤིང་གསན་བསམ་ཡུན་རིང་མཛད། པཎ་ཆེན་བློ་བཟང་ཆོས་རྒྱན་ལས་བརྙེན་རྫོགས་ཀྱི་སྡོམ་པ་བཞེས། དེ་ནས་རང་ཡུལ་དུ་ཕེབས་ཤིང་སླར་སྐུ་འབུམ་རྒྱུད་པ་གྲྭ་ཚང་དུ་ཞུགས་ཏེ་རིམ་གྱིས་རྒྱུད་པའི་བླ་མ་དབུ་མཛད་དང་། རྒྱུད་པ་མཁན་པོའི་ཁྲི་ལ་བཞུགས་ནས་འཆད་ཉན་དང་ཕྱག་ལེན་བཅས་ལ་རྟིང་བསྐུལ་དང་དག་ཐེར་ནན་ཏན་དུ་མཛད། རབ་བྱུང་བཅུ་གཅིག་པའི་ཤིང་མོ་ཡོས་ལོ་སྟེ་སྤྱི་ལོ 1675 ལོར་བྱ་ཁྱུང་དགོན་པའི་གདན་སའི་ཁྲི་ལ་བཞུགས་ཤིང་ལོ་ངོ་བཅོ་ལྔའི་རིང་དུ་གདན་ས་བསྐྱངས། འཆད་ཉན་དང་ཀུན་སྤྱོད་བཅས་ཚགས་འཛིན་གནང་ཞིང་། འདུ་ཁང་དབུས་འབུབ་གྱན་དགུ་མ་དང་། བླ་བྲང་ཕྱི་ར་ནང་སྐོར་བཅས་པ་གསར་བཞེངས་མཛད། མཛད་བཅུ་དང་། གནས་བཅུ། ཙོང་ཁ་བརྒྱད་ཅུ། འཇིགས་བྱེད་དང་ཆོས་སྐྱོང་ཁག མཁན་བརྒྱུད་དང་རྗེ་བཙུན་དམ་པའི་འཁྲུངས་རབས། ཞལ་ཐང་སོགས་ཐང་ག་ཞེ་ལྔ་དང་། བྱམས་པའི་གསེར་སྐུ་ཁྲུ་ལྷག གསར་འདུས་བློས་བསླང་བཅས་མང་པོ་བཞེངས། དེ་ནས་སླར་དབུས་སུ་ཕེབས་ཤིང་ཇོ་ཤཱཀ་རྣམ་གཉིས་དང་། རྒྱལ་དབང་ལྔ་བ་རིན་པོ་ཆེ། སྡེ་སྲིད་སངས་རྒྱས་རྒྱ་མཚོ་བཅས་མཆོད་བཀུར་བསྙེན་[1479]གསུམ་མཛད། རྒྱལ་དབང་ལྔ་བ་རིན་པོ་ཆེས་ཁོང་མཁན་ཆས་ཡོངས་རྫོགས། ཞབས་ཕྱིའི་གྲངས་བཅད། མཁན་པོའི་བཀའ་ཐམ་བཅས་གནང་བ་ནས་བཟུང་བྱ་ཁྱུང་གི་མཁན་རབས་རིམ་བྱོན་རྣམས་ལ་མཁན་པོའི་ཆོ་ལོ་ཡོད་པར་གྱུར། ཁྲི་ཟུར་ནས་ཆུ་དཀར་རི་ཁྲིད་དུ་སྒྲུབ་པ་ཉམས་ལེན་མཛད་ནས་དགུང་ལོ་དྲུག་ཅུ་ཐམ་པར་དགོངས་པ་ཆོས་དབྱིངས་སུ་གཤེགས། ཁོང་ནི་སྐུ་འབུམ་རྒྱུད་པ་གྲྭ་ཚང་གི་ཁྲི་རབས་བཞི་པ་དང་། བྱ་ཁྱུང་དགོན་པའི་མཁན་རབས་ཉེར་གསུམ་པ་ཡིན་ནོ། །
- language:
- Tibetan