- dung mtsho ras pa/
- ID:
- T90144
- དུང་མཚོ་རས་པ (Tibetan, Tibetan script, Original)
- > dung mtsho ras pa/ (Tibetan, Latin script, Transliteration-THL Extended Wylie Transliteration)
- > dungtso repa (Tibetan, Latin script, Transcription-THL Simplified Tibetan Transcription)
Other Dictionaries
2. gangs can mkhas grub rim byon ming mdzod
ཁོང་ནི་སྤྱི་ལོའི་དུས་རབས་བཅུ་གསུམ་པའི་དུས་མགོ་ཙམ་དུ་ཡར་ཀླུང་གཡག་མཁར་སྔོན་པོར་ཡབ་ཞང་སྒོམ་འབྱུང་གནས་འོད་དང་། ཡུམ་ཁུ་མོ་ཁྱེ་འདྲེན་འབུམ་གཉིས་ཀྱི་སྲས་སུ་སྐུ་འཁྲུངས་པའི་མཁས་གྲུབ་ཆེན་པོ་ཞིག་ཡིན། ཁོང་གཞོན་ནུ་དུས་ནས་སྤྱན་སྔ་གསེར་ཐོག་པ (1250—1310) ཡི་ཞབས་ལ་གཏུགས་ནས་རབ་ཏུ་བྱུང་ཞིང་མཚན་ལ་ཤེས་རབ་རྒྱལ་མཚན་ཞེས་གསོལ། དེ་ནས་ཁ་རག་ལྷ་མཚོར་ཕེབས་ཏེ་འཁྲུལ་ཞིག་ཁམས་པའི་དྲུང་དུ་དཀའ་ཐུབ་མང་པོ་ཞུས། དེ་ནས་བལ་ཡུལ་དུ་ཕེབས་ཏེ་གཏེར་གྱི་ཁ་བྱང་བླངས་ཤིང་དྭགས་ལྷ་སྒམ་པོར་བྱོན། རིན་པོ་ཆེ་རྡོར་བློ་བ་ལས་བསྙེན་པར་རྫོགས་ཤིང་མཚན་ལ་རིན་ཆེན་བཟང་པོ་ཞེས་གསོལ། དེ་ནས་ཆོས་གཏེར་བཏོན་ཏེ་སེམས་ཁྲིད་ཀྱི་བརྒྱུད་པ་སྤེལ། ཀཱ་ལ་དུང་མཚོར་སྤྱིལ་བུ་བརྩིགས་ནས་ཆས་བསགས་ཏེ་ལོ་སྒྲུབ་ལ་བཞུགས། གནས་སྐོར་བའི་རི་བ་བརྒྱད་བརྒྱ་ཙམ་འདུས། འགྲོ་མགོན་རིན་ཆེན་མཛེས་ལ་གཏེར་ཆོས་ཟབ་མོའི་ཁྲིད་བཏབ་པས་རྟོགས་པ་ཁྱད་པར་ཅན་རྒྱུད་ལ་སྐྱེས། དེ་ནས་རས་པ་བརྒྱད་བརྒྱ་འདུས་པ་ལ་གཏེར་ཆོས་ཀྱི་ཁྲིད་བཏབ། ཕྱིས་ལྷོ་གཉལ་ལ་སོགས་པའི་ཡུལ་མང་པོར་འགྲོ་དོན་མཛད། མཐར་གྲང་མོའི་རྫ་ཆུ་དར་མོར་ཡུན་རིང་དུ་བཞུགས་ཏེ་བསྟན་འགྲོའི་དོན་ཆེན་མཛད་དོ། ཁོང་གི་སློབ་མ་གྲགས་ཆེ་བ་ནི་བླ་མ་འཁྲུལ་ཞིག་སྣའུ་བ་དང་། ཙ་རི་རས་པ། བྱེ་མ་རས་པ། དོམ་ཚང་རས་པ། སྒྲོད་ལུང་པ། སྟག་ཚང་རས་པ་བཅས་ཡིན། །[826]
- language:
- Tibetan